Aqtóbede sheteldik jumysshylardy ákelýge zańsyz ruqsat bergen sheneýnik jazalandy
AQTÓBE. QazAqparat - Ádep keńesi sheteldik jumysshylardy tartýǵa zańsyz ruqsat bergen sheneýnikke eskertý berdi, dep habarlaıdy QazAqparat tilshisi.
Aqtóbe oblysynyń qazirgi Baıǵanın aýdanynyń ákimi Qaırat Otarov oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy qyzmetinde júrgende 25 sheteldik azamattyń munaı kompanııasynda jumys isteýine zańsyz ruqsat bergen.
Búgin ol Ádep keńesinde basqarmanyń sheteldik jumys kúshin tartý jáne halyqtyń kóshi-qon máseleleri jónindegi bóliminiń basshysy Roza Alenovamen birge jaýap berdi.
«Ákimshilik quqyqbuzýshylyq kodeksiniń 519 baby boıynsha jaýapqa tartylyp, jergilikti atqarýshy bıliktiń ruqsatynsyz sheteldik jumysshylardy tartqany úshin jazalandy. Sol úshin 1,6 mıllıon teńge aıyppul salyndy. 2018 jyldyń tamyz-jeltoqsan aılary men 2019 jyldyń qańtar-naýryz aılarynda «Vostok neft» kompanııasyna 25 sheteldik jumysshyny alýǵa zańsyz ruqsat bergen. Kóshi-qon basqarmasy oblystyq jumyspen qamtýdy úılestirý jáne áleýmettik baǵdarlamalar basqarmasyna bul týraly eskertý berip, munaı kompanııasy ákimshilik jaýapqa tartylǵanyn aıtqan. Sondyqtan tártiptik jaza qoldanýdy suraımyz», - dedi Aqtóbe oblysy prokýratýrasy basqarmasynyń aǵa prokýrory Erbolat Erenov.
Ádep keńesine kelgen qazirgi Baıǵanın aýdanynyń ákimi Qaırat Otarov óz áreketin
bylaısha túsindirdi:
«Shetel azamattaryn kirgizýge komıssııa qurylǵan. Sol komıssııany oblys ákiminiń
orynbasary basqarady. Ári sol jerde kóshi-qon basqarmasynyń ókili boldy. Ol da
sheteldik jumysshylardy ákelýge qarsylyq bildirgen joq. Komıssııa qarsy bolmaı,
biz buıryq shyǵardyq. Degenmen kemshilikti moıyndaımyz», - dedi Q.Otarov.
Tártiptik isterdi qaraý nátıjesinde Ádep jónindegi keńes Q.Otarovqa jáne R.Alenovaǵa qyzmetke tolyq sáıkes emestigi týraly eskertý túrindegi tártiptik jazalar qoldanýdy usyndy.
