Aqtóbede sheteldik ınvestorǵa 350 mln teńge zańsyz salyq salynǵan - agenttik

AQTÓBE. QazAqparat - Sybaılas jemqorlyqqa qarsy is-qımyl agenttigi fermerlik sharýashylyqty qate eseptelgen qosymsha keden salyǵynan qorǵap qaldy, dep habarlaıdy QazAqparat tilshisi agenttiktiń baspasóz qyzmetine silteme jasap.

Agenttiktiń habarlaýynsha, «Green Capital Kazakhstan» kompanııasy jańa jylyjaı tehnologııasyn qoldana otyryp, Aqtóbe oblysynda kókónis ósiredi. Memleket basshysy Qasym-Jomart Toqaev bıyl mamyr aıynda kásiporynnyń jumysymen tanysqanda fırma dırektory Dırk Aleven qyzanaqtyń jyl saıynǵy ónimi shamamen 3 myń tonna bolatynyn málimdegen.

«Ár apta saıyn biz 100 tonnadan jınaımyz. Negizinen 80 paıyzy Reseıge eksportqa ketedi. Qazir bizde 90 adam jumys isteıdi. Jylyjaı bes gektarda ornalasqan. Biz taǵy 5-eýin salǵanda qyzmetkerler sany 150-160 adamdy quraıdy», - dep Dırk Aleven aıtqan bolatyn.

Bıznesmen qazaqstandyq BAQ-qa bergen suhbatynda jylyjaıdyń qurylysyna ruqsat alýǵa 100 000 evro (500 mln teńge) jumsaǵanyn atap ótti. Alaıda, is munymen bitpepti. Nıderlandtyq ınvestor elge túrli jabdyqtar ákelýdi sheshedi. Osyǵan kelgende Memlekettik kiris komıtetiniń keden organdary jospardan tys tekserý uıymdastyryp, tehnıkany qate jiktegeni úshin Green Capital Kazakhstan-ǵa qazynagerler 350 mln teńge qosymsha baj salyǵyn salǵan. Fırma ókilderiniń aıtýynsha, bul somanyń qaıdan paıda bolǵanyn eshkim naqty túsindirip bere almapty.

Aqyry, ınvestorlar óz múddesin qorǵaý úshin Sybaılas jemqorlyqqa qarsy is-qımyl agenttigine, naqtyraq aıtqanda, «Protecting business and investments» jobalyq keńsesine júgingen.

«Árıne, biz mundaı qosymsha esepteýlermen kelispeı, jobalyq keńse men oblystyq ákimdikke júgindik. Tek osydan keıin ǵana bári ózgere bastady», - deıdi «Green Capital Kazakhstan LLP» JShS tehnıkalyq dırektory Erlan Jańabergenov.

Agenttik aralaspaǵanda kompanııany 1 mln dollarlyq shyǵyn bankrot etip, sol arqyly Aqtóbe oblysyn 240 jumys ornynan aıyrar edi

«Tekserý qorytyndysy boıynsha qate jiktegeni úshin atalǵan kásiporynǵa 350 mln teńgeden astam qosymsha keden esepteýlerin kórsetken. Bul kompanııa men ınvestıtsııalar jónindegi komıtet arasyndaǵy keden salyǵyn tóleýden bosatý túrindegi ınvestıtsııalyq jeńildik berilgen kelisim-shartqa qaramastan bolǵan», - dedi Sybaılas jemqorlyqqa qarsy is-qımyl Agenttigi tóraǵasynyń orynbasary Shyńǵys Qabdýla.

Nátıjesinde, QR Qarjy mınıstrliginiń appelıatsııalyq komıssııasy ınvestor men kedenshiler arasyndaǵy daýdy qarastyrdy. Aıyppul keden salymdary tek Sybaılas jemqorlyqqa qarsy qyzmet aralasqannan keıin ǵana toqtatylyp otyr.