Aqtóbede sheteldik ınvestordyń nusqaýymen alaıaqtyq jasaǵan topqa úkim shyqty
Aqtóbede sheteldik ınvestor men onyń sybaılastaryna qatysty sot otyrysy úsh aı buryn bastalǵan bolatyn. Sottalýshylar arasynda birneshe kompanııa dırektory men esepshileri, zańgerler, Aqtóbe oblystyq ádilet basqarmasynyń mamandary bar.
Al jábirlenýshilerdińsany 160-qa jetken. Olardyń bári nesıege páter alyp, aı saıyn bankke emes, kásipker ashqan nesıelik uıymǵa aqsha tólep otyrǵan. Aldanǵanyn bilgen turǵyndar oblystyq ІІD-ge aryz jazyp, tergeý jumystaryna qatysty. Sonymen qatar, ekinshi deńgeıli bank te qylmystyq is kezinde ınvestor kepilge qoıǵan páterlerdi daýlady. Al ınvestor Gegam Asrıan halyqarylyq izdeýde júr. Búgin №2 qalalyq sotynda Qylmystyq kodekstiń «Alaıaqtyq» baby boıynsha qaralǵan iske úkim shyqty.
«Qylmystyq kodekstiń «Alaıaqtyq», «Uıymdarǵa salynatyn salyqty jáne bıýdjetke tólenetin basqa da mindetti tólemderdi tóleýden jaltarý» baptary boıynsha Ánzııa Berdenova aıypty dep tanylyp, 6 jylǵa bas bostandyǵynan aıyrylsyn. Raqymshylyq jasaý týraly zańyna sáıkes jaza merzimi 3 jylǵa qysqartylady. Vıktor Sırota 6 jylǵa bas bostandyǵynan aıyrylsyn. Ekeýiniń de alaıaqtyq jolmen tapqan tabysy men múlki tárkilensin»,- dedi sýdıa Erlan Baqytjan.
Sottalýshy Elvıra Beznosıýk Qylmystyq kodekstiń «Alaıaqtyq» baby boıynsha 3 jylǵa, Qaıyrbek Orynbasarov 5 jylǵa, Alfıra Sultanova 2 jylǵa, Ádilbek Qarabalın 5 jylǵa, Olga Demskaıa 2 jyl 6 aıǵa bas bostandyǵynan aıyryldy.
Aqtóbe oblystyq ádilet basqarmasynyń eki qyzmetkeri ekinshi deńgeıli bank kepildiginde turǵan páterlerdi tizimnen shyǵarǵany úshin alǵan páterlerdi keri qaıtarady. Al bank pen 100-den astam jábirlenýshiniń aryzy qaralmady. Páterlerdi ıelerinde qaldyrý týraly shaǵym azamattyq iste qaralady. Qylmystyq kodekstiń «Uıymdarǵa salynatyn salyqty jáne bıýdjetke tólenetin basqa da mindetti tólemderdi tóleýden jaltarý» baptary boıynsha aıyptalǵan Ánzııa Berdenova, Vıktor Sırota 644 mıllıon teńge salyq qaryzyn tóleýi tıis.
Buǵan deıin habarlaǵanymyzdaı, sottalýshy Ánzııa Berdenovaǵa asa iri kólemde bótenniń múlkin ıemdengeni úshin aıyp taǵyldy . Ol adamdardyń senimine kirip, Gegam Asrıan, Vıktor Sırota, Elvıra Beznosıýkpen birlesip, Qaıyrbek Orynbasarov, Alfıra Sultanovanyń kómegimen alaıaqtyq jasaǵan.
2010 jyly «Oksı Bıld» kompanııasynyń bas esepshisi bolyp jumys istegen ol Gegam Asrıannyń senimdi ókili bolǵan. Keıin ol «Oksı Bıld» kompanııasynyń dırektory qyzmetin atqardy. 2013 jyly «Adal Úmit» JShS qurylady. Ózi sol kompanııaǵa dırektor bolyp taǵaıyndaldy.
Al Vıktor Sırota aldymen bas ınjener bolyp jumysqa ornalasyp, 2014 jyly «Oksı Bıld» kompanııasynyń dırektory boldy. Aıyptalýshy Elvıra Beznosıýk 2013 jyly «KESh Kredıt» shaǵyn nesıe uıymyna dırektory bolyp jumysqa ornalasty.
Іs materıalyna súıensek, Aıyptalýshy Olga Demskaıa kompanııada zańger bolyp jumys istep, alaıaqtyq jumystarǵa aralasqan. 2015 jyly Gegam Asrıannyń 8 kompanııasy boldy. Olar «Adal Úmit», «KESh Kredıt», «Sanjar Grýpp», «Aktobe Hınteg», «Oksı Bıld», «Remstroıservıs Samurat», «Sanjar Intermarket» JShS men «Arman -2020» TÚK qurǵan.
Uıymdasqan top 2016 jyldyń 2-14 maýsym aralyǵynda Forte banktegi 1 mıllıard 118 mıllıon teńgeden astam kepil múlikti shyǵaryp alǵan. Keıin «Adal Úmit» JShS-nyń tirkeýinde turǵan páterler «Arman-2020» turǵyn úı kooperatıvi arqyly satyldy. 
