Aqtóbede shetelden kelgenderge 440 oryndyq úsh karantın statsıonary ashyldy
Aqtóbe oblys ákimdiginde karantın erejelerin oryndaýǵa qatysty jıyn ótti. Sanıtarlyq-epıdemıologııalyq jaǵdaıǵa qatysty máseleler qaraldy. Oblys ákiminiń birinshi orynbasary Nurjaýǵan Qalaýov óńirdegi epıdemıologııalyq jaǵdaıdyń turaqty ekenin jetkizdi.
«Koronavırýs indetiniń jańa faktileri anyqtalǵan joq. Naýqastardyń 98,3% aýrýhanadan shyqty. Tósek-oryn júktemesi 78%-dan 14,6%-ǵa deıin azaıdy. 315 ınfektsııalyq kereýet daıyndaldy. Rezervte áli 3588 kereýet bar. Alty zerthanada 155 544 PTR testi, 21 653 ekspress-test alyndy»,- deıdi Nurjaýǵan Qalaýov.
Ol Qazaqstan shekarasyndaǵy ótkizý beketterinde koronavırýs ınfektsııasynyń aldyn alý sharalary aıasynda 6 qazannan bastap 440 kereýeti bar karantın statsıonarlarynyń jumys isteıtinin aıtty.
Shetelden kelgen azamattar eki táýlikke A.Dosjanova atyndaǵy jataqhanaǵa, Mártók aýdany Jaısań aýylyndaǵy kolledjge, Qarǵaly aýdany Álimbet aýylyndaǵy ınternatqa jatqyzylatyn boldy.
Buǵan qosa óńirde ekinshi tolqynǵa daıyndyq kúsheıtildi. Statsıonarlardaǵy kereýetter sany qajet bolǵan jaǵdaıda 315-ten 3603-ke deıin, sonyń ishinde jansaqtaý bólimindegi kereýetter sany 401-ge artady.
Medıtsınalyq mekemelerdiń materıaldyq-tehnıkalyq bazasyn kúsheıtý, jabdyqtaý sharalary qabyldandy. 1547 tósek-orynnyń 93% ottegimen, úsh statsıonar ortalyqtandyrylǵan ottegimen qamtylǵan.
Medıtsına mekemelerinde dári-dármekter men jeke qorǵanys zattarynyń eki aılyq qory jasaqtaldy.
37 baqylaý toby myńnan asa zańbuzýshylyqty anyqtap, 633 adam jaýapqa tartyldy, 79 mln teńge aıyppul salyndy.
Oblys ákimi shetelden kelgen óńir turǵyndaryna saqtyq sharalaryn ustaný, baqylaý toptarynyń jumystary týraly aqparattyq-túsindirý jumystaryn kúsheıtýdi tapsyrdy.