Aqtóbede shetelden kelgen adamdar qatań baqylaýǵa alyndy
AQTÓBE. QazAqparat – QR Prezıdenti Qasym-Jomart Toqaevtyń elde Tótenshe jaǵdaı rejımin engizý jónindegi tapsyrmasynan soń Aqtóbede shuǵyl jıyn ótti.
Azyq-túlik baǵasyn baqylaý, janar-jaǵarmaı baǵasyn qadaǵalaý jáne shetelden kelgen azamattardy tekserý jumystary kúsheıtildi, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbe oblysynyń ákimi Ońdasyn Orazalın Prezıdent Qasym-Jomart Toqaevtyń Qazaqstan Respýblıkasy halqynyń qaýipsizdigin qamtamasyz etý maqsatynda jarııalaǵan tótenshe jaǵdaıyna baılanysty shuǵyl jıyn ótkizdi.
Oblys ákiminiń orynbasarlary, qala, aýdan ákimderi men departament, basqarma basshylary, saýda oryndarynyń ókilderi qatysqan basqosýda Aqtóbe oblysynda tótenshe jaǵdaı rejımin qamtamasyz etý, aldyn alý sharalaryn kúsheıtý máselesi talqylandy.
«Dúnıejúzine taraǵan indetke qatysty óz tarapymyzdan jan-jaqty sharalardy qamtamasyz etetin bolamyz. Salǵyrttyq tanytpaý qajet, árqaısysymyzǵa artylǵan tıisti mindetterdi durys atqaryp, úlken jaýapkershilikpen qaraýǵa mindettimiz»,-dedi Ońdasyn Orazalın.
Óńir basshysy turǵyndardy úreılenbeýge shaqyrdy. Aqtóbedegi «Dına», «Anvar» syndy azyq-túlik dúkenderi, Halyqqa qyzmet kórsetý ortalyqtary toqtaýsyz jumysyn jalǵastyrady. Aımaq basshysy saýda oryndarynyń basshylaryna azyq-túlik baǵasyn ósirmeýdi jáne qyzmetkerleriniń saqtyq sharalaryn oryndaýyn sondaı-aq, qoǵamdyq kólik tasymaldaý mekemeleriniń basshylaryna avtobýstarda dezınfektsııa jumystaryn júrgizýdi tapsyrdy.
Densaýlyq saqtaý basqarmasynyń basshysy Áset Qalıevke barlyq qoǵamdyq oryndarǵa COVID-19 koronavırýsynyń belgileri jaıynda habarlandyrýlar taratyp, Aqtóbede shyǵarylatyn betperde sanyn arttyrý qajettigin aıtty.
Oblys ákimi jıynǵa selektorlyq rejımde qatysqan aýdan basshylaryna aýdandarda qurylǵan Shuǵyl shtab jumysyn jandandyrý kerektigin atap ótti.
«Aqtóbede jaǵdaı turaqty, degenmen de «Saqtyqta qorlyq joq» degen sóz bar. Birinshiden jaýapkershilik, uıymshyldyq, aýyzbirshilik tanytý arqyly aqtóbelikterdiń bul synaqtan da súrinbeı shyǵaryna senemin»,- dedi aımaq basshysy.
Aıta keteıik, Aqtóbede Italııa, Frantsııa, Ońtústik Koreıa jáne AQSh-tan kelgen azamattar karantınde jatyr. Olardan arnaıy synama alynyp, tekserýge jiberildi.
