Aqtóbede shetelden ákelingen iri qaralar qasaqana ýlanǵan bolýy múmkin - veterınar

AQTÓBE. QazAqparat - Aqtóbede 253 bas «Angýs» tuqymdy iri qaranyń kózi joıylyp jatyr. Veterınar mamandar maldyń qyrylýyna baılanysty eki joramaldy jarııalady, dep habarlady QazAqparat tilshisi.

Aqtóbe oblysynyń Hromtaý aýdany Qopa aýylynda asyl tuqymdy iri qaranyń qyrylyp qalǵanyn buǵan deıin habarlaǵan bolatynbyz.«Aktep» JShS-nyń dırektory Orazaq Samuratov kúdiktenip, polıtsııaǵa aryz jazǵanyn  málimdedi. 
Al búgin oblystyq veterınarııa basqarmasy jaǵdaıdy baqylaýǵa alyp, mamandar keńesinen soń maldyń qyrylýy sap tyıylǵanyn jetkizdi.
«Hromtaý aýdanynyń Qopa eldimekenindegi sharýashylyq 18 tamyz kúni iri qarany soıýǵa májbúr boldy. Jaramsyz bolyp qalǵan mal basy 253-ke jetti. Oqıǵa ornyna veterınar mamandar jeberildi. Soıylǵan mal eti bazarǵa, dúkenge túspeı, órteledi. Órteý jumystary áli jalǵasyp jatyr. Oqıǵa ornynda sanıtar mamandar, aýmaqtyń veterınarııa ınspektsııasy men veterınarııa basqarmasynyń mamandary júr. Baqylaý jalǵasady. Birinshi joramal boıynsha mal shópten ýlanǵan. Ekinshiden, qasaqana ýlaǵan bolýy múmkin. Negizi barlyq jaǵdaı tún mezgilinde bolǵan. Sharýashylyq ıesi zerthana sheshimin kútip jatyr», - dedi Aqtóbe oblystyq veterınarııa basqarmasynyń basshysy Keńes Qanatbaev.

Aıta keteıik, Aqtóbe oblystyq veterınarııa basqarmasy joıylǵan angýs tuqymdy maldyń dál qaı ýaqytta shetelden ákelingenin aıta almady.

«Joıylǵan iri qara mal qazirgi ýaqytta uryqtandyrýǵa daıyndalyp jatqan bolatyn. Oqıǵa bolǵan kúni mamandar baryp, keńes berdi. Ýlaný tez arada tyıylyp, ózge mal aman qaldy», - dedi Keńes Qanatbaev.