Aqtóbede sheneýnikterdiń salǵyrttyǵynan mektepter jylýǵa artyq aqsha tóledi

AQTÓBE. QazAqparat - Aqtóbede tabıǵı monopolııalardy retteý departamenti qujatqa salǵyrt qarap, tarıfti kóterýge ruqsat bergen. Nátıjesinde barlyq mektep pen balabaqsha, ákimdik, quqyq qorǵaý organdary jylýǵa artyq aqsha tólegen, dep habarlaıdy QazAqparat tilshisi.

Aqtóbe qalalyq sotynda oblystyq tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentiniń basshysy Gúlnur Masına men onyń orynbasary Nurlan Bolatbaevqa qatysty sot otyrysy bastaldy. Buǵan deıin habarlaǵanymyzdaı, eki sheneýnikke Qylmystyq kodekstiń «Salǵyrttyq» baby boıynsha aıyp taǵyldy.

Іs materıalyna súıensek, «Aqtóbe jylý elektr ortalyǵy» AQ tarıfti bekitý úshin 2017-2022 jyldarǵa arnalǵan ınvestıtsııalyq baǵdarlama ázirlegen. Qujat tapsyrý kezinde ınvestıtsııalyq baǵdarlamany iske asyrý úshin bankten nesıe alynatyny kórsetilgen. Sol kezde oblystyq tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamenti tarıfti bekitýge kelisim beredi. Biraq prokýrorlar tekserýinen keıin «Aqtóbe jylý elektr ortalyǵy» AQ bankten nesıe almaǵany, tarıfti bekitý kezinde júktelgen mindetter oryndalmaǵany anyqtaldy. «Aqtóbe jylý elektr ortalyǵy» AQ tarıf kótergen kezde jylý taratýshy «Transenergo» AQ-nyń da qyzmeti qymbattady.

«Jylý taratýshy «Transenergo» AQ 2017 jyldyń 22 jeltoqsanynda tarıfti bekitedi. Jańa tarıf boıynsha bıýdjettik mekemeler úshin 1 Gkal jylý 8623,96 teńgeden 13 325, 35 teńgege ósip ketti. 2018 jyldyń 1 qańtary men 2018 jyldyń 31 jeltoqsany aralyǵynda bıýdjettik mekemeler jylý taratý kompanııasyna 428 mıllıon teńgeden astam artyq aqsha tólegen», - dedi prokýror Elýbek Talasov.

Aıyptaý qorytyndysynan soń departament basshysy Gúlnur Masına men onyń orynbasary Nurlan Bolatbaev ózine taǵylǵan aıyppen kelisken joq. Qazirgi ýaqytta sot otyrysy jalǵasyp jatyr.