Aqtóbede sheneýnikter qyzmettik kóligimen Reseıge baryp-kelip júrgen
AQTÓBE. QazAqparat - Aqtóbede memlekettik mekeme basshylarynyń qyzmettik kóligimen jeke maqsattar shekaradan ótý faktileri anyqtaldy, dep habarlaıdy QazAqparat.
Memlekettik qyzmet isteri jáne sybaılas jemqorlyqqa qarsy is-qımyl agenttigi Aqtóbe oblystyq departamentiniń málimetinshe, memlekettik organ basshylyǵynyń memlekettik múlikti jeke maqsatta paıdalanýy - tártiptik sharadan qylmystyq jaýapkershilikke deıin jazalanýǵa ákep soǵatyn is-áreket.
«Departament «2030» áskerı bólimimen birlesip, «Jaısan» shekara beketinde monıtorıng júrgizdi. Іs-shara barysynda memlekettik avtokólikti jeke maqsatta paıdalaný faktileri anyqtaldy» delingen habarlamada.
Osylaısha, aǵymdaǵy jyldyń 13 maýsymynda Hromtaý aýdandyq veterınarııalyq stantsııasynyń basshysy memlekettik nómiri 233 AB 04 «SSANG YONG ACTYON SPORTS» avtokóligimen jeke jumystarymen shekaradan ótip, Reseı Federatsııasynyń Orynbor oblysy Aqbulaq aýdanynda turatyn týysyna barǵan. 15 maýsym kúni Qobda aýdandyq veterınarııalyq stantsııasynyń basshysy memlekettik nómiri 453 AB 04 «SSANG YONG ACTYON SPORTS» avtokóligimen Reseı Federatsııasy Orynbor oblysy Aqbulaq kentindegi týysyna barý úshin shekarany kesip ótken. 1 qyrkúıek kúni «Respýblıkalyq veterınarııalyq zerthana» Aqtóbe oblystyq fılıalynyń basshysy memlekettik nómiri 699 AR 04 «Skoda» avtokóligimen qyzmettik maqsattan tys shekara beketinen ótken.
«Monıtorıng qorytyndysy boıynsha joǵaryda atalǵan basshylar tártiptik jaýapkershilikke tartyldy» dep málim etti departamentten.
Aıta ketý kerek, jyl basynan beri departamenttiń qoǵamdyq baqylaý kartasyna memlekettik avtokólikti maqsattan tys paıdalaný týraly 5 derek kelip tústi. Onyń ishinde Aqtóbe qalasy ákimdiginiń, Hazret aýyldyq okrýginiń, eńbek, áleýmettik qorǵaý jáne kóshi-qon departamentiniń júrgizýshileri bar, nátıjesinde barlyq jaýapty tulǵalar tártiptik jaýapkershilikke tartyldy.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysy boıynsha departamenti memlekettik nómiri bar avtomobılderdi qyzmetten tys ýaqytta paıdalanǵanyna kýá bolǵan barsha azamattardyń myna telefondarǵa habarlasýyn ótinedi: koll-tsentr: 8-7132-550984, jumys telefony: 8-7132-541252.
