Aqtóbede shekarashylar arheologııalyq qundy jádigerdi tasymaldaǵan adamdy ustady

AQTÓBE. QazAqparat – Aqtóbedegi Álimbet shekara beketinde qundy jádigerdi alyp ótpek bolǵan Reseı azamaty ustaldy. Barlyǵy 26 dana jádigerdi arheologtar qarap shyqty, dep habarlaıdy QazAqparat tilshisi.

Aqtóbe oblysy aýmaǵyndaǵy Álimbet shekara beketiniń shekarashylary kólik ishin qarý kezinde kúdikke ilikken zatty tapty. Ashyp qaraǵan kezde onda bir ýys jebeniń ushy tabyldy.

«Reseı azamatynan 26 dana arheologııalyq qundy jádiger tabyldy. Onyń sózinshe Áıteke bı aýdanyna balyq aýlaýǵa kelgende, taýyp alǵan. Biraq qazir tergeý jumystary júrip jatyr. Biz bar tapqan qundy dúnıeni mýzeıge tapsyrdyq», - dedi UKK Shekara qyzmeti AOD áskerı qyzmetshisi Rınat Magrýpbekov.

Aqtóbe oblystyq tarıhı-ólketaný mýzeıiniń dırektory Meıram Dúısenǵalı tabylǵan jádigerdiń qundy ekenin aıtty.

«Mýzeıdiń arheolog mamandary bul dúnıelerdi tarıhı-mádenı qundy jádiger dep otyr. Temir dáýirine jatatyn úsh qyrly qola jebe, qola dáýirine jatatyn jebeniń ushy, orta ǵasyrlarǵa jatatyn temirden jasalǵan jebe ushtary bar. Kúmisten jasalǵan áshekeı men at ábzeli, ıaǵnı, júgeniniń doǵasy anyqtalyp otyr. Úsh kezeńniń dúnıesi qolymyzda tur. Bizge túsken málimet boıynsha olarda metall izdeıtin quryl bolǵan. Demek ádeıi daıyndalyp kelgen», - dedi Meıram Dúısenǵalı. Onyń aıtýynsha, jádigerdi tereńnen qazyp almaǵanǵa uqsaıdy. Tergeý bitken soń jádiger mýzeı qoryna beriledi.

Aıta keteıik, oblystyq mýzeıde 120 myńǵa jýyq jádiger bar. Onyń 20 myńǵa jýyǵy arheologııalyq jádiger.