Aqtóbede shekarany zańsyz kesip ótpek bolǵan 18 sheteldik ustaldy
AQTÓBE. KAZINFORM — Olar qysh taqtaısha tıelgen dep mórlengen júk kóligine minip, «Jaısań» shekara beketin kesip ótpek boldy. Qazir tergeý júrip jatyr.
QR UQK Shekara qyzmeti Aqtóbe oblystyq departamentiniń habarlaýynsha, zańsyzdyq 8 naýryz kúni saǵat 19:55–te tirkeldi. Tranzıttik júk kóligine Ózbekstan men Tájikstan azamattary jasyrynǵan. Zańsyzdyqty «Jaısań» shekara beketiniń shekarashylary anyqtady.
— Ózbekstannan Reseıge baǵyt alǵan tranzıttik júk kóliginiń tirmekesinde 22 tonna qysh taqtaısha bar dep kórsetilgen. Alaıda kóliktiń tirkemesin ashyp qaraǵan kezde shekarany zańsyz kesip ótpek bolǵan 3 ózbekstandyq, 15 tájikstandyq anyqtaldy. Tranzıttik júk kóligin Ózbekstan azamaty basqardy. Atalǵan fakt boıynsha sotqa deıingi tergep-tekserý bastaldy. Basqa aqparat Qylmystyq-protsestik kodekstiń 201-babyna sáıkes jarııa etýge jatpaıdy, — dep habarlady QR UQK Shekara qyzmeti Aqtóbe oblystyq departamenti.
Sonymen birge jedel tergeý toby Qazaqstan aýmaǵyndaǵy deldaldar bolýy múmkin degen kúdikpen taǵy 5 azamatty ustady. Bári de ózbekstandyq. Olar da shekara mańynda qolǵa tústi. Qazir Qylmystyq kodekstiń 392-baby aıasynda tergeý júrip jatyr.
Buǵan deıin habarlaǵanymyzdaı, Aqtóbede turatyn alty myńnan astam sheteldik tekserildi.
Olardyń keıbiri turǵylyqty mekenjaıyn aýystyrǵan, qujattarynyń merzimi ótip ketken. Sondaı-aq sheteldikterdi zańsyz tirkeýge qoıǵan páter ıeleri de jaýapqa tartyldy.
