Aqtóbede shekaradan ótpek bolǵan júk kóliginen 29 sheteldik anyqtaldy
AQTÓBE. KAZINFORM — Jaısań shekara beketinde kóliktegi júk arasynan 29 sheteldik anyqtaldy. Olar osy kúıde shekarany kesip ótpek boldy.
Oqıǵa 12 mamyr kúni boldy. UQK baspasóz qyzmetiniń habarlaýynsha, zańsyzdyq Jaısan avtokólikti baqylaý bóliminde anyqtaldy.
— Reseıge baǵyt alǵan tranzıttik júk kóligin tekserý kezinde sýsyn qoraptary (22 tonnaǵa jýyq Coca-Cola sýsyny) arasynan adamdar tabyldy. Memlekettik shekarany zańsyz kesip ótpek bolǵan 29 shetel azamaty anyqtaldy. Osy oqıǵadan soń Qylmystyq kodekstiń 394-baby (Zańdy emes kóshi-qondy uıymdastyrý) boıynsha UQK Shekara qyzmeti Aqtóbe oblysy boıynsha departamenti sotqa deıingi tergeýdi bastady, — dep habarlady UQK baspasóz qyzmeti.
UQK Memlekettik shekarany buzý qylmystyq jáne ákimshilik jaýapkershilikke ákeletinin atap ótti.
- UQK shekara qyzmeti ulttyq zańnamaǵa sáıkes Qazaqstan Respýblıkasynyń Memlekettik shekarasyn jáne onyń rejımin buzý qylmystyq jáne ákimshilik jaýaptylyqqa ákep soǵatynyn eske salady, - delingen habarlamada.
Buǵan deıin habarlaǵanymyzdaı, Túrksib aýdandyq polıtsııa basqarmasy kóshi-qon qyzmetiniń mamandary reıd barysynda zańsyz jumys istep júrgen 15 shetel azamatyn anyqtady.