Aqtóbede shekara mańynan ushqyshsyz ushý apparatynyń synyǵy tabyldy
AQTÓBE. KAZINFORM — Dron Qarǵaly aýdany Álimbet aýyly mańynda qulady. Qazir tekserý júrip jatyr.
Aqtóbe oblystyq PD baspasóz qyzmetiniń habarlaýynsha, ýákiletti qyzmetter oqıǵa ornyna bardy. Dron synyǵy shamamen 8:30–da anyqtaldy.
— Qarǵaly aýdanynda ushqyshsyz ushý apparatynyń synyqtaryna uqsas zattardyń tabylýy deregi boıynsha tekserý jumystaryn júrgizip jatyr. Atalǵan nysan eldi mekennen tys aýmaqta anyqtalǵan. Oqıǵanyń barlyq mán-jaıy tekseriledi, — dep habarlady oblystyq PD baspasóz qyzmeti.
Aqtóbe oblystyq TJD baspasóz qyzmetiniń habarlaýynsha, TJD jáne «Aýyl qutqarýshylary» órt sóndirý pýnktiniń qyzmetkerleri Álimbet aýyly mańynda tutanǵan otty sóndirdi. Munda qurǵaq shóp jandy. Aýdany 500 sharshy metrdi qurady.
Buǵan deıin habarlaǵanymyzdaı, Batys Qazaqstan oblysy aýmaǵynda ushqyshsyz ushatyn apparattyń qulaǵany jóninde aqparat tarady. Turǵyndardyń sózine qaraǵanda, ushqyshsyz ushatyn apparat Qaraýyltóbe aýyly mańyna qulaǵan.
