Aqtóbede shekara beketindegi uzyn-sonar kezektiń negizgi sebepteri aıtyldy
AQTÓBE. KAZINFORM — «Jaısań» shekara beketinde 8, al Reseı tarapyndaǵy «Saǵyrshyn» shekara beketinde 2 ótkizý jolaǵy bar. Bul teńsizdikten uzyn-sonar kezek túziledi.
Aqtóbeniń «Jaısań» shekara beketinde taǵy da kólik keptelisi boldy. Bul joly 100-den astam júk kóligi turyp qalǵan. Máseleniń mán-jaıyn anyqtap, usynystar qabyldaý úshin Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńes otyrysy ótti. Munda problemalarmen qatar ony sheshý joldary týraly aıtyldy.
— Óńirlik kásipkerler palatasyna Halyqaralyq avtokólik tasymaly qaýymdastyǵynan shaǵym túsip jatyr. «Jaısań» shekara beketinde álsin-áli júk kólikteri turyp qalady. Saldarynan bıznes ıeleri kelisimshartty ýaqytyly oryndaı almaıdy, tez buzylatyn taǵamdar jaramsyz bolyp qalady. Munyń bári shyǵyn, oblystyń ınvestıtsııalyq ımıdjine keri áserin tıgizedi. Memlekettik kirister departamenti, Óńirlik kásipkerler palatasy, shekara qyzmeti, prokýratýra shekaradaǵy ótkizý jolaǵynyń bir-birine saı emes ekenin aıtyp, kórsetti. Qazaqstan tarapynan 8 jolaq bolsa, Reseı tarapynan 2 jolaq bar. 19-aqpanda «Jaısań» shekara beketinde shamamen 160 júk kóligi boldy. Al Sarjansaı aýyldyq okrýginde taǵy 170 kólik kezegin kútip turdy, — dedi Óńirlik kásipkerler palatasy dırektorynyń orynbasary Rýslan Kýıshınov.
Onyń aıtýynsha, Aqtóbeniń Mártók aýdany kútý alańyn salýǵa 11 gektar jer bóldi. Bul aýmaq júrgizýshilerdiń tanyǵyp, aýqattanýyna múmkindik beretin kempıng bolady. Kútý alańynyń syıymdylyǵy — 400 kólik. Investor 5 mlrd teńgeden astam qarjy quıyp, bıznes bastaýy múmkin. Mártók aýdany ákiminiń orynbasary Aıbat Erbaezıevtiń aıtýynsha, kásipker bıyl tek 4 gektar jerdi ıgerýdi josparlap otyr. Jumys jyl sońynda aıaqtalady.
Alaıda bul shekaradaǵy kezekti azaıtýǵa arnalǵan joba emes. Tek kútý alańynda júrgizýshilerdiń jaǵdaıyn jasaı alady. Al shekaranyń ótkizý qabiletin arttyrý úshin eki el Úkimetiniń sheshimi qajet.
— Shekara beketiniń ótkizý qabileti ótkizý jolaǵy men tólqujatty baqylaý ornynyń sanyna baılanysty. Qazirgi kezde «Jaısań» shekara beketi barlyq talapqa saı. Alaıda kelesi tarap biz jibergen lekti qabyldap úlgermeıdi. Úkimetke eki el arasyndaǵy shekara ótkizý beketiniń máselesin qaıta qaraý týraly usynys bergen durys dep esepteımin. Reseı tarapy ótkizý jolaǵyn keńeıtse másele óz-ózinen sheshiledi. Al qystaǵy keptelis joldyń aýa raıyna baılanysty jabylýynan boldy, — dedi QR UQK Shekara qyzmetiniń Aqtóbe oblysy boıynsha departamenti bastyǵy Baýyrjan Rysbekov.
Onyń aıtýynsha, shekarada beıtarap aýmaq joq. Shekara beketinde Qazaqstan terrıtorııasynan keıin birden Reseı jeri bastalady.
Aqtóbe oblystyq memlekettik kirister departamenti EAEO sheńberinde QQS ákimshilendirý basqarmasynyń basshysy Asylan Sadyqovtyń aıtýynsha, júk kóliginiń aǵyny kóbeıgen. 23 aqpanda táýligine 203, 24-i kúni 276, al 25 aqpanda 319 júk kóligi ótti. 26 aqpanda kólik sany 356-ǵa jetken.
— Qazir shekaradan táýligine 350 júk kóligin ótkizýge ruqsat bar. Endi ony 250 etip qysqartý týraly usynys berip otyrmyz. Sebebi ótkizý qabileti tómen, al kólikter shekara mańynda turyp qalady. Sanyn qysqartar bolsaq, kólikter shekara mańynda emes, kútý alańy Sarjansaı aýyldyq okrýginde turar edi, — dedi Asylan Sadyqov.
Sońǵy bir aptada Reseı tarapynyń ótkizý qabileti tipti úsh ese tómendep ketken.
Aıta keteıik, keńes otyrysynda «Jaısań» shekara beketindegi keptelisti azaıtý úshin aǵyndy «Álimbet» shekara beketine burý, sonymen birge shekaradaǵy qylmystyq aldyn alý jumystaryn kúsheıtý usynyldy. Sebebi dál osyndaı keptelis kezinde buzýshylyqtar jıi tirkeledi.
— Júrgizýshiler de shekaradan ótý zańdylyqtaryn buzady. Byltyr mamyr aıynda júk kóligine jasyrynyp ótpek bolǵan 28 adam anyqtaldy. Qarasha aıynda taǵy 10 adam ustaldy. Júrgizýshilerdiń ózine de túsindirý jumystaryn júrgizý kerek. Olar Ózbekstan, Tájikstan azamattaryn alyp ótpek boldy. Bul da keptelis týdyrady. Ol kezde bir kólik jarty saǵat boıy turyp qalady, — dedi QR UQK Shekara qyzmetiniń Aqtóbe oblysy boıynsha departamenti bastyǵy Baýyrjan Rysbekov.
Eske salsaq, dál osyndaı jaǵdaı bıyl Atyraý oblysynyń Reseı memleketimen shekarasyndaǵy «Qurmanǵazy» avtomobıl ótkizý pýnktinde de tirkeldi.
Sonymen birge BQO-nyń «Syrym» avtomobıl ótkizý beketinde de uzyn-sonar kezek túzildi.