Aqtóbede shegirtkege qarsy óńdeý jumysy aıaqtalyp qaldy
AQTÓBE. KAZINFORM — Bıyl 500 myń gektardan astam jer óńdelýi tıis. Qazirgi kezde jospar 93% oryndaldy.
Aqtóbe oblysy boıynsha 513 myń gektar jer shegirtkege qarsy óńdelýi tıis. Bul jumys shilde aıynyń 10-15 kúnderi aralyǵynda tolyq aıaqtalady.
— Eginge, shabyndyqqa, jaıylymǵa qaýip joq. Sharýalardan da shaǵym túspedi. Qazir men Oıyl aýdanynda júrmin. Shóptiń shyǵymy óte jaqsy, shegirtkeden qaýip kórinbeıdi. Áıteke bı, Hromtaý jáne Oıylda ýlaý jumystary jalǵasyp jatyr. Shegirtke shyqqan kezde ýlanady, jappaı shyǵyn joq. Taǵy bir aıta keteıin, 513 myń gektardyń bárin óńdeý maqsat emes. Shegirtke bolmasa ol jerge ý sebilmeıdi, — dedi AShM Agroónerkásiptik keshendegi memlekettik ınspektsııa komıtetiniń Aqtóbe oblystyq aýmaqtyq ınspektsııasynyń basshysy Asylhan Ábtıev.
Aıta keteıik, ýlaý jumysy Aqtóbede mamyr aıynda bastaldy. Al byltyr Aqtóbe oblysynda 820 myń gektardan astam jer óńdeldi. Ásirese Reseımen shekaralas aýdan aýyldarynda dernásilder tabylyp, ýlandy.