Aqtóbede shegirtke taraǵan 700 myń ga jerdiń jartysynan astamy óńdeldi

AQTÓBE. KAZINFORM — Aqtóbede qazir kórshiles Reseımen shekaralas aýdandarǵa basymdyq berildi. Shegirtke jumyrtqasy Áıteke bı aýdanynan tabyldy. Al ońtústik aýdandarda ushý deregi tirkelgen.

Aqtóbe oblysynda 700 myń gektardan astam jer ıtalııalyq shegirtkege qarsy óńdelýi tis. Qazirgi kezde 470 myń gektary óńdeldi. 

— Óńdeý jumysy júrgizilgen soń keı jerlerde kishkene shegirtke qalyp qoıady. Sondaı derekterdi turǵyndar vıdeoǵa túsirip alyp, taratyp jiberedi. Jappaı ushý deregi tirkelmedi. Qazirgi kezde oblys boıynsha 470 myń gektar aýmaq shegirtkege qarsy óńdeldi. Ár aýdandaǵy jaǵdaı ártúrli. Oblystyń ońtústik aýdandarynda shegirtke jasy úlkeıse, Áıteke bı aýdanynda ázirge kishkentaı. Eginge, baý-baqshaǵa zııany týraly shaǵym túspedi, — dedi QR AShM agroónerkásiptik keshendegi memlekettik ınspektsııa komıtetiniń Aqtóbe oblystyq aýmaqtyq ınspektsııasynyń basshysy Dastan Saǵyrov.

Qazirgi kezde aýmaqtyq ınspektsııa men respýblıkalyq fıtosanıtarııalyq dıagnostıka jáne boljamdar ádistemelik ortalyǵynyń oblystyq fılıal mamandary kórshiles Reseı mamandarymen birge monıtorıng jasap otyr. 

— Eki elde de kezdesý, monıtorıng júrip jatyr. Eki jaqta da shegirtkeni ushýǵa jetkizbeı, anyqtaý, ýlaý jumysy atqarylady. Tehnıka bar. Ázirge eginge tústi degen aqparat joq. Keıde jolǵa shyǵyp ketedi. Anyqtalsa, mindetti túnde ýlaıdy. Jalpy oblysta 1,6 mln gektar jer tekserildi. Onyń ishinde 472 myńy óńdeýge jatady dep belgilendi, — dedi Garıfýlla Jolaev. 

Aqtóbe oblysy úshin qazir Áıteke bı, Qarǵaly, Mártók aýdandarynda baqylaý kúsheıtildi.

— Áıteke bı aýdanynda qazir shegirtke shyǵyp jatyr. Biraq jappaı shyǵý tirkelmedi. Ár jerden ǵana shyǵady, ony ýlaımyz. Sonymen birge Mártók, Qarǵaly aýdandarynda da osyndaı jaǵdaı. Al ózge aýdandarda aldy qanattanyp jatyr. Bul jappaı ushady degen sóz emes. Kóp degende 50-100 metr jerge ushady. Ony der kezinde ýlaıdy, — deıdi respýblıkalyq fıtosanıtarııalyq dıagnostıka jáne boljamdar ádistemelik ortalyǵy Aqtóbe oblystyq fılıal basshysy Garıfýlla Jolaev. 

Eske salsaq, shegirtkege qarsy ýlaý jumysyna barlyǵy 105 tehnıka jumyldyryldy.

Arasynda An-2 ushaǵy, deltaplan nemese asa jeńil ushaq, aerozoldy generator men ÝAZ avtokóligindegi jer ústi búrikkishteri bar. 

Anyqtaý kezinde mamandar qum arasyna kire almaı otyr. Sebebi onda kiretin jol talǵamaıtyn tehnıka joq.