Aqtóbede shatyry janyp ketken kópqabatty úı turǵyndary kómek surap otyr
AQTÓBE. QazAqparat – Aqtóbe qalasynda kópqabatty jataqhana turǵyndary janyp ketken shatyrdy jóndeı almaı, ákimdikten kómek surady, dep habarlaıdy QazAqparat tilshisi.
Byltyr qarasha aıynda Aqtóbe qalasynyń daǵdarys jaǵdaılaryndaǵy basqarý basqarmanyń kezekshi bólimine jataqhanadan órt shyqqany týraly habarlama tústi. Órtti sóndirýge jeke quramnan 25 adam jáne 7 tehnıka jumyldyrylǵan. Sol kezde 200 adam evakýatsııalandy. Qazir sol úıdiń turǵyndary kóktemgi jańbyrdan qorqyp otyr.
«Bizde páter ıeleri kooperatıvi joq, úıimiz ıesiz tur. Buǵan deıin termojańǵyrtýdan ótken jataqhanany qaıta jóndeýge aqsha bere almaımyz. Sebebi áli kúnge deıin jóndeý jumystarynyń qaryzyn ótep júrmiz. Órt kezinde sý shashyldy. Qysta ol muz bolyp qatyp, endi kóktemde erıdi dep qorqyp otyrmyz», - dedi úı turǵyny Aıjan Esbolatova.
Taǵy bir turǵyn Jámıla Jumaǵulova páterine kirýge qorqatynyn aıtýda.
«Besinshi qabatta turatyn adamdar úshin qıyn. Shatyrymyz joq, birer kúnnen soń sýǵa ketýimiz múmkin. Shatyr qaýipti. Jel kúsheıse jabyndy qulyp, tómen túsip jatyr. Balalar dalaǵa shyǵady. Bireýiniń basyna túsip ketse, múgedek bolyp qalady», - dedi J. Jumaǵulova.
Turǵyndar termojańǵyrtý jumystarynan soń qaıta qarjy jınaý qarapaıym halyq úshin qıyn ekendigin aıtýda.
«Qazirgi kezde Aqtóbe qalasynyń ákimdigi qalpyna keltirý jumystaryn qarastyryp jatyr. Buǵan deıin 4-5 qabatta turatyn adamdarǵa arnaıy kómek kórsetildi. Olarǵa qarjylaı kómek berdi. Jobalyq-smetalyq qujat daıyndaldy. Jalpy quny 25 mıllıon teńgege shyǵyp tur. Saraptama qorytyndysy da negizge alynady. Buǵan deıin termojańǵyrtý jumysyn júrgizgen merdiger kompanııanyń nemese ózge kásipkerler kómegimen qalpyna keltiremiz», - dedi qalalyq turǵyn úı ınspektsııasynyń sektor meńgerýshisi Aqnur Qazbaeva.
