Aqtóbede «shattandyrǵysh gaz» toltyrylǵan eki tsısterna jáne myń dana ballon tárkilendi

AQTÓBE. KAZINFORM - Azot oksıdi bar gaz Reseıden Aqtóbege jetkizilgen. Qoımadan «shattandyrǵysh gaz» tárkilenip, kúdikti áýejaıda ustaldy.

- Aqtóbe oblysynda júrgizilgen jedel tergeý is-sharasy barysynda qoıma aýmaǵynan azat totyǵy toltyrylǵan eki júk tsısternasy men 1033 ballon tárkilendi. Atalǵan zattar Qazaqstan aýmaǵyna Reseı Federatsııasynan jetkizilgen. Bıyldan bastap kúshti áser etetin zattardyń, onyń ishinde azot totyǵynyń zańsyz aınalymy úshin qylmystyq jaýapkershilik engizildi. Polıtsııa kúshti áser etetin zattardy zańsyz ákelý, saqtaý nemese ótkizý áreketterin shekaradan bastap sońǵy tutynýshyǵa deıingi barlyq kezeńdi qatań túrde qadaǵalaıdy,- dedi Aqtóbe oblysy PD EQQІQB bastyǵy Berik Aısın.

Іs Qylmystyq kodekstiń «Ýly zattardyń, sondaı-aq esirtki, psıhotroptyq zattardy, sol tektesterdi nemese ýly zattardy daıyndaý nemese qaıta óńdeý úshin paıdalanylatyn zattardyń, qural-saımandardyń nemese jabdyqtardyń zańsyz aınalymy» baby boıynsha qozǵaldy.

Aıta keteıik, Kámeletke tolmaǵan qyzylordalyq túngi klýbta azot oksıdi quıylǵan shar satqan. Reıd barysynda túngi klýbtan 10 lıtrlik 4 gaz ballony jáne polıetılen paketke salynǵan 6 shar anyqtalyp, zattaı dálel retinde alyndy.