Aqtóbede shatyry órtengen kópqabatty jataqhana turǵyndary kómek surady

Aqtóbe qalasy Sátbaev kóshesinde 5 qabatty shaǵyn otbasyǵa arnalǵan jataqhananyń shatyry órtendi. Órtti sóndirýge 70-ten astam adam jáne 30-ǵa jýyq tehnıka jumyldyrylǵan. Órt kezinde 50 adam, onyń ishinde 12 bala evakýatsııalandy. Turǵyndar úshin arnaıy avtokólik bazasynda jylytý pýnkti uıymdastyryldy.

- Saǵat 01:55-te órt shyqty. Órt saǵat 03:39-da oqshaýlanyp, keıin sóndirildi. Aýdany 290 sharshy metrdi qurady,- dedi Aqtóbe qalasynyń TJB bastyǵy Danarbek Imanǵazın.

Búgin oqıǵa ornyna Aqtóbe qalasy kóshesin tazalaýǵa jaýapty merdiger kompanııa jumysshylary baryp, tazartý jumystaryn júrgizdi. Arasynda «Jasyl el» jasaǵynyń jastary da bar. Al turǵyndar bolsa ys basqan kıim-keshegi men búlingen zattaryn dalaǵa shyǵaryp, tazartý jumysyn júrgizip jatyr.

- Myna bir bólmeni qyzym men kúıeý balam alyp, 2 mln teńgege jóndeý jasatty. Ekeýi de muǵalim, eki balasy bar. Órt bolǵan kezde esik qaǵyp, bárin shyǵarǵan. Búgin úıge kelsek sý basyp jatyr, kermeli tóbe sozylyp ketken. Bizge jóndeýge kómek kerek. Basy artyq eshteńe suramaımyn, tek jóndep berse bolady,- dedi qala turǵyny Baqtygúl Imanberlına.

Aqtóbe qalasy ákiminiń baspasóz qyzmetiniń habarlaýynsha, turǵyndar Aqtóbe oblystyq TJD-nen páter nemese úı órtendi dep anyqtama alyp, qalalyq jumyspen qamtý jáne áleýmettik baǵdarlamalar bólimine tapsyrady. Sodan keıin ǵana páter ıelerine 100 AEK kóleminde ǵana qarjy aýdarylady.

Aıta keteıik, Shahtınsktegi garajdardyń birinde órt shyǵyp, jasóspirim kóz jumdy.