Aqtóbede sharýanyń jerin kıik taptap jatyr

AQTÓBE. KAZINFORM — Aqtóbede «Qumqudyq» JShS-niń 1200 ga jerin kıik taptady. Qazir arnaıy komıssııa baryp, naqtysyn anyqtap jatyr.

Aqtóbe oblysy Áıteke bı aýdanyndaǵy «Qumqudyq» JShS-niń dırektory Aleksandr Chemodanov egis alqabyna kıik kirgenin aıtyp, «Ohotzooprom» mekemesine, Aqtóbe oblysy boıynsha orman sharýashylyǵy jáne janýarlar dúnıesi aýmaqtyq ınspektsııasyna, jergilikti ákimdikke habar berdi. 

— Qazir egis alqabynda kıik júr. Biz ne isteı alamyz? Biz qýamyz, olar azdan soń qaıta keledi. Aıqaılaı almaımyz, ysqyra almaımyz. Alqapqa baryp, kóliktiń sıgnalyn basamyz, kólikpen aıdaımyz. Odan nátıje kórip otyrǵanym joq. Bul problema 2023 jyly bastalyp, sodan beri jalǵasyp keledi. 2023 jyly akt toltyryp, shyǵyn eseptelgenimen ótelmedi. Ol kezde shamamen 16 myń ga boldy. Qazir úsh aýmaqqa kirdi. Ekeýi mal azyǵy, bireýi kúzdik bıdaı. Bul shamamen 1200 ga alqap. Munda «Ohotzooprom ÓB» mekemesinen úsh adam júr, — dedi Aleńsandr Chemodanov.

Sharýa jeriniń aýdany — 75 myń ga. Onyń 20 myń ga ıgerip otyr. Sonyń bárine qaýip tónip tur.

— Biz mal azyǵynan, astyqtan aıyrylamyz, qaryzǵa batamyz. Ári qaraı ne bolatynyn bilmeımiz. Qazir atqarýshy organnyń bári jaǵdaıdy biledi, bárine habar berildi. Bizde 1500 bas iri qara bar. Oǵan 3 myń tonna jem-shóp kerek. 2023 jyly táýlik boıy kólikpen júrip, kúzettik. Bıyl qoldan kelmeı tur. Kıik sanyn retteý kerek dep oılaımyn. Biz adamǵa azyq daıyndaımyz ba, álde kıik baǵamyz ba? Sony túsinbedim. Buryn kıik sany rettelgen. Tipti tabıǵat ózi rettep otyrǵan, — dedi sharýa.

Aqtóbe oblysy boıynsha orman sharýashylyǵy jáne janýarlar dúnıesi aýmaqtyq ınspektsııasynyń basshysy Ádilkereı Áýelbaevtyń aıtýynsha, egis alqabynyń jaǵdaıyn bilýge birneshe maman bardy.

— Habar bizge keshe keldi. «Ohotzooprom» mekemesinen, ınspektsııadan mamandar bardy. Sonymen birge jergilikti atqarýshy organ biledi. Biz qazir tek ony úrkite alamyz. 2024 jyly úrkitip, alqapty saqtap qalý qoldan keldi. Bıyl da eki brıgada barady. Ol 14 adam. Negizi barlyǵy 28 adam bar. Olar eki topqa bólinip, 15 kúnnen almasyp jumys isteıdi. Tek úrkitemiz, odan basqa jol joq, — dedi Ádilkereı Áýelbaev.

Onyń aıtýynsha, terrıtorııada kıik júretin 48 myń ga jer bar. Onyń bárin qamtý múmkin emes. Degenmen úrkitý nemese ótkizip jiberý ádisi qoldanylady. 

— Eginge maýsym, shildede barady. Al bul sharýanyń aıtyp turǵany kópjyldyq shóp, ekinshisi kúzdik bıdaı. Barǵan komıssııa bárin qaraıdy, — dedi ol.

Eske salsaq, 2023 jyly Aqtóbe oblysy boıynsha eki aýdanda aýyl sharýashylyǵy maqsatyndaǵy jerdi kıik taptap ketti. Aýmaǵy 16 myń gektar boldy. 

Vıdeo: Aleksandr Chemodanov