Aqtóbede sharýalardyń kóbi mal azyǵyn daıyndap aldy
Aqtóbe oblysynda bıyl shamamen mıllıon bas mal qystaıdy. Tórt túlikke bir jarym jyldyq jem-shóp daıyndalyp jatyr. Bul shamamen 2,8 mln tonna bolady. Qazirgi kezde onyń 96,8% daıyndalǵan. Sonymen birge 6 myń tonna pishendeme, 8 myń tonna súrlem, 12 myń tonna saban daıyndaý jospary bar.
«Kóktemgi-kúzgi maýsymdyq mal azyǵyn daıyndaý úshin 189 572 ga jer ýaqytsha paıdalanýǵa berilip, shóp shabý jumystary júrgizildi. Oblys boıynsha shóp shabý naýqanyna barlyǵy 10,8 myń aýyl sharýashylyǵy tehnıkasy, onyń ishinde 2,8 myń traktor, 2,1 myń traktor tirkemesi, 2,7 myń shóp shabatyn mashına, 1,8 myń shóp tyrmasy, 1,4 myń pishen presi qoldanyldy»,- dedi Aqtóbe oblystyq aýyl sharýashylyǵy jáne jer qatynastary basqarmasy basshysynyń orynbasary Asylhan Ábtıev.
Qazirgi kezde bir oram shóp baǵasy 5000 teńge. Shamamen salmaǵy 250-300 keli bolady. Al salmaǵy 18-23 keli bolatyn bir taı shóp 450 teńge.
«Ózim sharýashylyqty 2014 jyly bastadym. Qarǵaly aýdanynyń Álimbet aýylynda ornalasqan. Múıizdi iri qara baǵamyn. 140 bas bar. Sol úshin de bıyl 3 myń oram shóp jınadym. Onyń 700 oramyn aýyl halqyna sattym. Quny bir oramyna 5 myń teńge. Byltyr 3-4 myń teńge bolǵan. Bıyl dızel otyny da qymbattap ketti. Kóterilý sebebi osydan. Me ózin bir jarym jyldyq azyq daıyndaımyn. Máselen byltyr daıyndaǵan 800-1000 býma shóp qaldy»,- dedi sharýa Serik Bazarbaev.
