Aqtóbede shań-tozańǵa batqan aýyl halqy kómek surady
AQTÓBE. QazAqparat – Aqtóbeniń Bershúgir aýylynyń turǵyndary kómek surap, aýyldyń shańǵa batqanyn, turǵyndardyń allergııaǵa shaldyqqanyn aıtyp berdi. Qazir ekologtar tekserý júrgizip jatyr, dep habarlaıdy QazAqparat tilshisi.
Shalqar aýdanynyń Bershúgir aýylynda qıyrshyq tas óndiriledi. Ol úshin taý-tasta jıi jarylys jasalyp, usaqtalady. Sol kezde aýyl shańǵa batyp qalady.
«Bizdi aınala shoǵyrlanǵan «Nurtas Aqtóbe», «Muǵaljar Neftestroı», «Temirtas», «Dıabaz», «Aqshat-Aqtóbe», «Qulan Tras», «Lashyn Tas Treıd», «Vostok Tsement Kommertsııa», «MINING INERT MATERIALS» tárizdi óndiris oryndary bar. Ol azdaı taǵy da jańa zaýyttar salynǵaly jatyr. Bul zaýyttar aýyldan 10-15 km kashyqtyqta bolýy kerek. Bizde olar 3-4 shaqyrymnan da jaqyn. Jel qaıdan soqsa da shań aýylǵa keledi. Taýdy nebir hımııalyq zattarmen jarady, sonyń shańy men ýy aýylǵa keledi. Taý jarǵannan úıler qozǵalady, bulaqtardyń kózderi bitelip, Shalqar kóline quıyp jatqan saılar tartylyp qaldy. Neshe túrli allergııamen aýyratyn adamdar kóbeıip ketti», - dep jazdy áleýmettik jelige aýyl turǵyny. Ári olar zaýyttardy jyraqqa kóshirýin suraǵan.
«Áleýmettik jelige 4-5 aı buryn túsirilgen sýretter salynǵan. Bir kompanııaǵa 2,8 mıllıon teńge aıyppul da salyndy. Endi zaýyttar sý shashyp, shań basatyn qurylǵyny ákelip, qondyryp jatyr. Negizi jeti zaýyt jumys istep tur. Óndiris ornyndaǵy jumysshylardyń 80 paıyzy sol aýyldyń turǵyny. Aýdannan on kún saıyn monıtorıng júrgizip, shań bolsa toqtatamyz», - dedi Shalqar aýdanynyń ákimi Baýyrjan Qanıev.
Aıta keteıik, qazir shań kótergen bir zaýyt jumysyn ýaqytsha toqtatqan. Oqıǵa ornyna turǵyndardyń aryzymen ekologtar da bardy.
«Bershúgirde 13 kásiporyn bar. Bizge aýyl turǵyndarynan shaǵym túsip, tekserý júrip jatyr. Qorytyndyny 20 tamyzda shyǵaramyz», - dedi oblystyq ekologııa departamenti basshysynyń orynbasary Erbolat Qojyqov.
