Aqtóbede shań sorǵysh alam dep basy daýǵa qalǵan tutynýshynyń quqyǵy qorǵaldy

AQTÓBE. KAZINFORM – Saýda jáne ıntegratsııa mınıstrligi Aqtóbe qalasyndaǵy quqyǵy buzylǵan tutynýshynyń oqıǵasyn jazdy. Tutynýshy bank arqyly 1 320 000 teńge somasyna Kirby Avalier shańsorǵyshyn nesıege satyp alǵan. 

Vedomstvonyń málimetinshe, aldymen kompanııa ókilderi tutynýshylar sanyn kóbeıtý maqsatynda olarǵa habarlasyp, kilemderin tegin tazalap berýdi usynǵan. Alaıda olardyń negizgi maqsaty Kirby Avalier shańsorǵyshyn satý bolǵan. 

Tutynýshynyń aıtýynsha, kompanııa menedjerleri shańsorǵyshtyń jumysyn kórsetip, baǵasyn basqa dúkenderdegi uqsas taýarlarmen salystyryp, jedel sheshim qabyldaýǵa yqpal etken. Sonymen qatar bonýs retinde tutynýshydan paıdalanylǵan shańsorǵyshyn qabyldap, quny 1 900 000 teńge bolatyn jańa shańsorǵyshty 1 320 000 teńgege satyp alýdy usynǵan. Alaıda tutynýshy burynǵy shańsorǵyshyn berýden bas tartqan. Soǵan qaramastan, taýar úshin tólem bank arqyly nesıege rásimdelgen. Keıin tutynýshy taýardan bas tartyp, qarajatty qaıtarýdy talap etken.

— Degenmen satýshy zańmen belgilengen merzimde paıdalanylmaǵan taýar úshin qarajatty qaıtarýdan bas tartqan. «Tutynýshylardyń quqyqtaryn qorǵaý týraly» Qazaqstan Respýblıkasy Zańynyń 14-babyna sáıkes, satyp alýshy ózine azyq-túlikke jatpaıtyn taýar berilgen kezden bastap on tórt kún ishinde, eger satýshy neǵurlym uzaq merzim jarııalamasa, satyp alynǵan taýardy satyp alý ornynda nemese satýshy habarlaǵan ózge de oryndarda baǵasynda aıyrma bolǵan jaǵdaıda satýshymen qajetti qaıta esep aıyrysa otyryp, basqa mólsherdegi, nysandaǵy, gabarıttegi, pishindegi, tústegi, jıyntyqtalymdaǵy jáne osy tárizdegi soǵan uqsas taýarǵa ne taraptardyń kelisimi boıynsha basqa taýarǵa aıyrbastaýǵa quqyly, — dep jazdy mınıstrlik. 

Satýshyda aıyrbastaýǵa qajetti taýar bolmaǵan jaǵdaıda satyp alýshy satyp alynǵan taýardy satýshyǵa qaıtaryp berýge jáne oǵan tólengen aqshalaı somany qaıtaryp alýǵa quqyly. Eger shartta ózgeshe shara kózdelmese, taýardy satyp alý orny aıyrbastaý nemese qaıtaryp berý orny bolyp tabylady.

Sonymen qatar, Zańnyń 30-shy babynda tutynýshylardyń belgilengen merzimde qaıtaratyn taýary paıdalanylmaǵan, onyń taýarlyq túri, tutynýshylyq qasıetteri, plombalary, zattańbalary, sondaı-aq taýardy satyp alý faktisin rastaıtyn qujaty saqtalýy qajet ekendigi kórsetilgen.

— Joǵaryda atalǵan Zańǵa sáıkes tutynýshyǵa quqyqtyq túsindirme jumysy júrgizilip, narazylyq paraǵyn jazýǵa kómek kórsetildi, sondaı-aq oryndaýshy tarapqa satýshynyń mindetteri boıynsha túsindirý jumysy júrgizildi, — delingen habarlamada.

Osynyń nátıjesinde tutynýshy men satýshy arasyndaǵy satyp alý-satý sharty buzylyp, 1 320 000 teńge somasyndaǵy rásimdelgen nesıe joıyldy.

Al Tutynýshy quqyǵyn qorǵaý týraly zań jobasyna qandaı jańa normalar engenin myna siltemeden oqı alasyz.