Aqtóbede shamamen jarty mıllıard teńgeniń qum toqtatý jobasy nátıje bermedi
AQTÓBE. KAZINFORM – Merdigerler úsh joba boıynsha 488 mln teńgege jýyq qarjyny ıgerdi. Alaıda sekseýil ósip shyqpady, qum toqtamady.
Aqtóbe oblystyq tabıǵı resýrstar jáne tabıǵatty paıdalanýdy retteý basqarmasy osydan tórt jyl buryn qum toqtatý jobasyna qarjy bóldi. Alǵashqy joba Yrǵyz aýdany Jarma aýylynda iske asyrylýy kerek boldy. Joba quny – 144,2 mln teńge. Merdiger 11,7 gektarǵa 19 200 túp sekseýil kóshetin otyrǵyzýy tıis. Alaıda jumys tolyqqandy atqarylmady.
- Yrǵyz aýdany Jarma aýylyna keler bolsaq, qum toqtatý jumystaryna 144,2 mln teńge qarastyrylǵan. Onyń 16,5 mln teńgesi ǵana aýdarylmady, qalǵany ıgerildi. Bul – 125,7 mln teńge. Munda merdiger uńǵyma qazbaǵan, tamshylap sýarý júıesi joq. Іs sotqa jetip, merdiger 5 mln teńgeden astam qarjyny keri qaıtardy,- dedi Aqtóbe oblystyq tabıǵı resýrstar jáne tabıǵatty paıdalanýdy retteý basqarmasy basshysynyń orynbasary Bekbolat Qulmaǵambetov.
Ekinshi joba - Baıǵanın aýdanynyń Barshaqum men Jarqamys aýyldaryndaǵy qum toqtatý jumysy. Munda aýmaq qorshaldy, uńǵyma qazyldy, sýarý júıesi bar. Biraq ekken sekseýil shyqpaı qaldy.
- 22 gektarǵa 42 300 túp sekseýil otyrǵyzylýy tıis boldy. Tekserý kezinde jumysty tolyqqandy atqarmaǵanyn kórdik, kelisimshart úzildi. Endi is sotqa joldanady. Eki jobaǵa 362 mln teńge aýdaryldy. Aqtóbe oblysynda osy úsh joba qum toqtatý jumysynyń basy edi.
Alaıda úsh joba da nátıjesiz bolyp tur. Ol merdigerdiń salǵyrttyǵynan,- dedi Bekbolat Qulmaǵambetov.
Onyń aıtýynsha, aldaǵy ýaqytta qum toqtatý jumysy orman sharýashylyqtaryna júktelýi múmkin.
Eske salsaq, Aqtóbe oblysynda 19 aýyldy qum basý qaýpi tónip tur. Ásirese Baıǵanın, Yrǵyz, Temir jáne Shalqar aýdandarynda qum kóshkini tirkeldi.
