Aqtóbede Shalqar kóliniń tabany tazalanyp jatyr
AQTÓBE. QazAqparat - Shalqar kóliniń túbin tazartý jumysy bastaldy. Qazir arnaıy tehnıkamen laıdy soryp alyp jatyr, dep habarlaıdy QazAqparat tilshisi.
Bıyl naýryzda QR Ekologııa, geologııa jáne tabıǵı resýrstar mınıstri Maǵzum Myrzaǵalıev Aqtóbe oblysyndaǵy Shalqar kóliniń tabany tazalanatynyn málimdegen edi . Keıin «Shalqar kóliniń túbin tazartý» jobasynyń tehnıkalyq-ekonomıkalyq negizdemesi ázirlenip, saraptamadan oń nátıje alyndy. Jobanyń jalpy somasy - 3 mlrd teńge. Bıyl bul maqsatqa respýblıkalyq bıýdjetten 432,95 mln teńge bólindi. Aqtóbe oblysynyń ákimi Ońdasyn Orazalın jumys sapary barysynda aýdannyń ekologııalyq jaǵdaıyna oń áserin tıgizetin joba jumysymen tanysty.
«Kóp jyldar boıy kútken jobanyń jemisin aýdan halqy kórýi tıis. Barynsha sapaly ári ýaqytynda júzege asyrý úshin barlyq qajetti sharalardy qoldanyńyzdar»,- dep tapsyrdy oblys ákimi Ońdasyn Orazalın «Tolagai - 2050» JShS-niń basshysy.
Kól túbin tazartý jumystary kól sýynyń sapasyn kóterip, gıdrohımııalyq quramyn jaqsartýǵa, Shalqar qalasynyń halqyn sharýashylyq-turmystyq sýmen qamtamasyz etýge múmkindik beredi dep kútilip otyr. Qazir arnaıy tehnıkanyń kómegimen laı sý sorylyp, ózge aýmaqqa aǵyzylyp jatyr.
