Aqtóbede Shalqar kólin tazartatyn merdigerler anyqtaldy
AQTÓBE. QazAqparat - Aqtóbedegi Shalqar kóliniń tabanyn tazartý jumysy bıyl bastalady. Jobaǵa aldymen 400 mln teńgeden astam qarjy bólinedi, dep habarlaıdy QazAqparat tilshisi oblys ákiminiń baspasóz qyzmetine silteme jasap.
«Shalqar aýdanynyń turǵyndary Shalqar kóliniń túbin tazartýǵa qatysty suraqty birneshe ret kóterip, burynǵy qalpyna keltirip berýdi suraǵan. Biz bul jumysqa mamandar men sarapshylardy tarttyq. Byltyr jobalyq-smetalyq qujattamany ázirleý jumystary aıaqtalǵan bolatyn. Úkimet atalmysh jobany qoldady, bıyl biz sony júzege asyratyn bolamyz. Aýqymdy joba eki jylǵa arnalǵan. Onyń óńir úshin rekreatsıalyq jáne sharýashylyq turǵyda mańyzy zor. Osy jobadan úlken ekologııalyq paıda tabamyz dep kútip otyrmyz»,- dep atap ótti oblys ákimi Ońdasyn Orazalın jıynda.
Qurylys, sáýlet jáne qala qurylysy basqarmasynyń basshysy Naǵymjan Aldııarov Shalqar kóliniń túbin tazartý jobasyn tanystyrdy. Onyń aıtýynsha, kól sýynyń tartylyp, batpaqqa aınalý máselesi ótken ǵasyrdyń sońynda bastaldy.
«Kól aǵyn sýdyń jetispeýinen, sý betinde jáne sý túbinde ósimdiktiń ósip ketýi saldarynan degradatsııaǵa ushyrap, sý sapasy nasharlady. «Shalqar kóliniń túbin tazartý» jobasynyń tehnıkalyq-ekonomıkalyq negizdemesi ázirlenip, saraptamadan oń nátıje alyndy. Jobanyń jalpy somasy 3 mlrd teńge. Osy jyly bul maqsatqa respýblıkalyq bıýdjetten 432,95 mln teńge bólindi. Sondaı-aq, salalyq mınıstrlikke qosymsha qarjy bólý úshin suranys jiberildi»,- dedi Naǵymjan Aldııarov.
Jıyn sońynda Ońdasyn Orazalın memlekettik organdar men merdiger mekemeniń basshylaryna óńir úshin mańyzdy jobanyń sapaly júzege asyrylýy úshin barlyq sharany qabyldaýdy tapsyrdy.
Eske slaa ketsek, taıaýda QR Ekologııa, geologııa jáne tabıǵı resýrstar mınıstri Maǵzum Myrzaǵalıev Aqtóbe oblysyndaǵy Shalqar kóliniń tabany tazalanatynyn málimdegen edi.
