Aqtóbede Shalqar aýdanynyń ákimi taǵaıyndaldy

Búgin Shalqar aýdandyq máslıhatynyń kezekten tys alpysynshy sessııasy ótti. Aqtóbe oblysynyń ákimi A.Shaharov Shalqar aýdany ákiminiń laýazymyna Aqsholaq Qaırat Serikbaıulynyń kandıdatýrasyn usyndy. Máslıhat depýtattary usynysty qoldady.

Shalqar aýdany ákimdiginiń resmı portalyndaǵy aqparatqa súıensek, Qaırat Aqsholaqov Memlekettik basqarý akademııasyn qarjy jáne nesıe, QR ІІM akademııasyn quqyqtaný mamandyqtary boıynsha támamdady. Eńbek jolyn Shalqar paıdalaný bólimshesinde operator, esepshi bolyp bastap, salyq ınspektsııasynda, salyq polıtsııasynda jumys istedi. 2006-2018 jyldar aralyǵynda Shalqar, Yrǵyz aýdandarynda ishki ister bóliminiń bastyǵy boldy. 2018 jyly quqyq qorǵaý salasynan memlekettik qyzmetke aýysty. 2020 jyldyń qyrkúıek aıynan búginge deıin Shalqar aýdany ákiminiń orynbasary boldy.

— Aktıvpen kezdesý barysynda oblys ákimi aýdannyń odan ári damýy úshin aıtarlyqtaı áleýeti bar ekenin atap ótti. 8 aıdyń qorytyndysy boıynsha aýyl sharýashylyǵy, qurylys, saýda jáne ınvestıtsııa salalarynda oń dınamıka qalyptasqan. Óńdeý ónerkásibi, shaǵyn jáne orta bıznesti damytý, jańa jumys oryndaryn qurý baǵyttaryndaǵy birqatar kórsetkish boıynsha jumysty kúsheıtý qajet. Aýdannyń jańa basshysyna ónerkásip pen aýyl sharýashylyǵy ónimderin qaıta óńdeýdi damytý, ınvestıtsııa tartý jáne kásipkerlikti qoldaý mindetteri qoıyldy. Sondaı-aq jer resýrstaryn tıimdi paıdalaný, asyl tuqymdy mal sharýashylyǵyn damytý, veterınarııa mamandarynyń jumys jaǵdaıyn jaqsartý jáne jańa jumys oryndaryn qurý máselelerine kóńil bólý tapsyryldy. Jastar arasynda profılaktıkalyq jumystardy kúsheıtip, quqyq buzýshylyqtardyń aldyn alýǵa baǵyttalǵan keshendi sharalardy júzege asyrý jáne óskeleń urpaq úshin qaýipsiz, jaıly ári qolaıly orta qalyptastyrý qajet, — dep habarlady Aqtóbe oblysy ákiminiń baspasóz qyzmeti.

Eske salsaq, ótken aptada Aqtóbe oblysy Oıyl aýdanynyń ákimi taǵaıyndaldy.