Aqtóbede shalǵaı jerdegi týrıstik nysandarǵa shaǵyn avıabeket salynýy múmkin

AQTÓBE. KAZINFORM — Qazir óńirde 46 týrıstik nysan bar. Aldaǵy ýaqytta Baıǵanın, Yrǵyz, Shalqar aýdandaryna shaǵyn avıabeket salý josparlandy.

Aqtóbede týrızmdi damytý jospary talqylandy. Oblystyq dene shynyqtyrý, sport jáne týrızm basqarmasynyń basshysy Meırambek Mahambetovtiń aıtýynsha, 46 týrıstik nysannyń úsheýi emdeý, shıpajaı ortalyǵy jáne 8-i erekshe qorǵalatyn tabıǵı aýmaq. Olar Yrǵyz-Torǵaı memlekettik tabıǵı rezervaty, Ebeıti, Orqash, Kókjıde-Qumjarǵan, Mártók, Qobda, Ozernyı, Oıyl qoryqtary, orman alqaby. Bıyl tarıhı mańyzǵa ıe Dosjan ıshan memorıaldyq kesheni, Abat-Baıtaq kesenesine jáne tabıǵaty erekshe Qasqyr sarqyramasyna barar jol qurylysy aıaqtalady.

— Jıyn barysynda shaǵyn avıatsııalyq beket salý máselesi de talqylandy. Qazirgi tańda Baıǵanın aýdanyndaǵy Aqtolaǵaı bor taýlary aýmaǵynda shaǵyn avıatsııalyq pýnkt salý jobasy pysyqtalyp jatyr. Týrıstik nysan oblys ortalyǵynan 446 shaqyrym qashyqtyqta ornalasqan. Osyndaı jobalardy Shalqar jáne Yrǵyz aýdandarynda da júzege asyrý josparlanyp otyr. Bul týrıstik nysandardyń kólik qoljetimdiligin arttyrýǵa múmkindik beredi. Oblys ákimi týrızm salasyndaǵy qyzmet kórsetý sapasyn arttyrdy, kadr daıarlaý jáne jergilikti halyqty jumyspen qamtýdy tapsyrdy, — dep habarlady Aqtóbe oblysy ákiminiń baspasóz qyzmeti.

Aıta keteıik, byltyr Aqtóbe oblysyna 233 myń týrıst kelgen. Onyń ishinde 14 myńnan astamy sheteldik. 

Eske salsaq, Týrızm jáne sport mınıstrligi 2026 jylǵa arnalǵan is-sharalar kúntizbesin daıyndady. Qujatta elimizdiń 20 óńirinde ótetin 55 iri is-shara qamtylǵan.