Aqtóbede shalǵaı aýyldardy gazben qamtý jumysy jalǵasyp jatyr
Aqtóbede shalǵaı aýyldarǵa gaz qubyryn tartý jumystary qarqyndy júrip jatyr. Bıyl gaz tasymaldaý júıesin jańartý jumystaryna 1,1 mıllıard teńge bólinse, qarjynyń teń jartysy 2016 jyly qurylysy bastalǵan jumystardy aıaqtaýǵa baǵyttaldy.
«Aqtóbe oblysynyń barlyq aýdan ortalyǵynda gaz qubyry tartylǵan. Qazirgi ýaqytta aýyldarǵa gaz berý jumystary júrgizilip jatyr. Máselen, ótken jyly Qarǵaly aýdanynyń Josaly jáne Kempirsaı aýyldaryna gaz jetkizý qubyryn tartý jumysy bastalyp, bıyl aýylishilik qubyr júrgizý jumysymen jalǵasty. Joba aıaqtalǵan kezde 37 áleýmettik nysan men 800-den astam adam kógildir otyndy paıdalana alady. Sonymen qatar, Shalqar aýdanynyń Baıqadam aýylyna jetkizýshi gaz qubyry tartylyp, Shetyrǵyz aýylynda aýylishilik gaz taratý jelisi júrgizilip jatyr»,- dedi oblystyq energetıka jáne turǵyn úı - kommýnaldyq sharýashylyǵy basqarmasy basshysynyń orynbasary Qarjaýbaı Ybraımuly.
Aıta keteıik, bıyl Áıteke bı aýdanynyń Araltóbe aýylyna gaz jetkizýshi qubyryn salyp, Shalqar aýylynyń Baıqadam aýylyna aýylishilik gaz qubyryn tartýǵa 257 mıllıon teńgeden astam qarjy bólinip, ıgerilip jatyr. Taǵy 16 aýylǵa gaz jetkizý úshin jobalyq-smetalyq qujattama daıyndalýda. Aýylǵa kógildir otyn jetkizý baǵdarlamasyn jalǵastyrý úshin bıyl jergilikti bıýdjetten 125,7 mln. teńge qarjy qarastyrylǵan. Negizinen Aqtóbe oblysynda halyqty gazben jabdyqtaý úlesi 86 paıyzdan asty.
