Aqtóbede shalǵaı aýylda borannan soń jol ashylmaı qaldy
AQTÓBE. QazAqparat - Aqtóbe oblysy Yrǵyz aýdany Qarasaı aýylynda qatynas toqtady. Munda borannan soń jol qardan tazartylmaı qaldy, dep habarlaıdy QazAqparat tilshisi.
Qumtoǵaı aýyldyq okrýgine qarasty Qarasaı aýylynda 30-40 tútin bar. Mundaǵy turǵyndar kóktem týa aralda qalǵandaı bolady. Sondyqtan naýryz aıynda mol azyq jınap, jazǵa deıin baılanyssyz otyrady.
«Ózim osy aýylda týyp-óstim. Balalarym ózge jerde bolǵanymen, ózim aýyldamyn. Zeınetkermin. Bıyl qysta múlde jol ashylmady. At shanamen, traktormen ortalyq jolǵa jetip qalamyz, sosyn kólik kútemiz. Aýrý-syrqaýy bar adamdar aldyn ala aýdanǵa jiberiledi»,- dedi aýyl turǵyny Naǵısha Іdirisova. Onyń aıtýynsha, dál osy shaqta ózderi tanıtyn kásipker arnaıy kelip, aýylǵa azyq-túlik satady. Aýyl adamdary bar qajetin satyp alyp, jazǵa deıin otyrady.
Qumtoǵaı aýyldyq okrýginiń ákimi Núrken Jubanazarovtyń aıtýynsha, bul aýyldyń joly 26-naýryz kúni ashylýy tıis bolǵan. Biraq traktor buzylyp qaldy.
«Traktor búgin jóndelse, erteń joldy ashady. Qatynas múlde joq dep aıta almaımyn. Traktorlar, Ýaz kólikteri qatynap jatyr. Mal azyǵy az kúnge jetedi. Qys uzaryp ketip, jylqy da áli dalaǵa shyǵarylmady»,- dedi Núrken Jubanazarov.
Onyń málimetine súıensek, memlekettik satyp alý baıqaýyna 2 merdiger túsken. Biriniń qujaty durys bolmaı, tender ótpeı qaldy.
«Yrǵyz aýdanynda kásipkermen kelisim júrdi. K700 avtokóligimen joldy qardan tazalaıdy. Memlekettik satyp alý bir kózden júrgiziledi. Qazir bıýdjetten qansha qarjy qarastyrylǵanyn aıta almaımyn. Oǵan aýdandyq turǵyn úı-kommýnaldyq sharýashylyǵy jaýapty. Ashyǵan saıyn qaıta basyp qalyp tur joldy»,- dedi aýyl ákimi.
Aıta keteıik, mundaǵy mektep 1985 jyly qamystan salynǵan. Mektep elektr togymen jylytylady. Barlyǵy 34 bala bilim alyp júr.
Mektep 9 jyldyq bolyp tur. Turǵyndary bolsa bilim ordasy jabylady dep qorqyp otyr. Dárigerlik ambýlatorııasy mektepke japsarlas ornalasqan. Aýylda uıaly baılanys joq.
«Aýylda halyq sany az. Sondyqtan áleýmettik nysandar salý jobasy qarastyrylmaǵan. Uıaly baılanys ta adam sany az bolǵan soń tartylmaı otyr»,- deıdi Núrken Jubanazarov.
