Aqtóbede shala týǵan balalarǵa kıim toqıtyn klýb jumys isteıdi
Aqtóbe qalasynyń toqymashylary senbi saıyn meıramhanalardyń birine jınalady. Kásipker shala týǵan balalarǵa arnap kıim toqıtyn topqa bir bólmeni tegin berip otyr. Munda olar jınalyp, shulyq, jempir, bas kıim men kórpeshe toqıdy. Bári salmaǵy 2 kelige jetpeıtin balaǵa arnap toqylady. Qolyna sym men jip ustaǵandardyń basym bóligi jumys isteıdi. Olar iri munaı kompanııalarynyń, joǵary oqý orny men medıtsınalyq mekemelerdiń qyzmetkerleri, esepshiler, kásipkerler. Aralarynda zeınetkerler de bar.
«Osydan 6 jyl buryn Almatyda toqymashylar klýby quryldy. Onyń negizin qalaýshy Karla Nur. Keıin Astanada, ózge oblys ortalyqtarynda qurylyp, jumys isteı bastady. Al Aqtóbede bir jarym jyldan beri jınalyp júrmiz. Áleýmettik jeli arqyly shala týǵan balalarǵa arnap kıim toqıtyn klýb jumysymen tanysyp, keıin Aqtóbede isti bastaýdy qolǵa aldym. Bizde toqymashylar kóp. Men jumysty janymdaǵy dostarymnan bastadym. Olar meniń úıime kelip, iske kiristi. Aqtóbe oblystyq perenataldyq ortalyqpen baılanys ornatyp, balalarǵa qajetti ólshemdi surap aldyq. Arada úsh apta ótkende alǵashqy kıimder jıyntyǵyn tapsyrdym»,- dedi topty úılestirýshi ıÝlııa Ýrekeshova.
Alǵashynda 5-6 adam bolsa, klýb týraly habar áleýmettik jeli arqyly tez tarady. Bir aıda olardyń sany 20-dan asyp, 50-ge jetti. Apta saıyn olardyń 30-y bir orynǵa jınalyp, kıim toqıdy. Keıbiri úıinde otyryp toqyp, berip jiberedi.
«Klýb músheleri jınalǵan kezde bir-birimen tanysyp, áńgimelesedi. Bastysy -qatarǵa qosylǵandardy toqýǵa úıretemiz. Biz 100 paıyz júnnen jasalǵan jipti paıdalanamyz. Negizgi talap osy. Úırestirýshi retinde kóterme saýda oryndaryna tapsyrys berip, jip aldyramyn. Boıaýy qanyq, ádemi túster tańdalady. Al sapasy balalardyń densaýlyǵy úshin mańyzdy. Shala týǵan balalardyń terisi tynys alýy tıis. Ári toqylǵan kıim massaj, jylytý quraly bolady. Taza júnniń osy qasıetteri talaı balanyń ósip, jetilýine septigin tıgizdi»,- dedi ıÝlııa Ýrekeshova.
Aıta keteıik, bir jyldan astam ýaqytta toqymashylar 1118 oramadan 559 kıimder jıyntyǵyn tapsyrdy. Qazirgi kúni 57 jıyntyq pen 8 jamylǵy daıyn tur. Jipti demeýshiler, toqymashylardyń ózderi, shala týǵan balalardyń ata-anasy tapsyrady.
«Árbir qatysýshy jipti ózi satyp alady. Bir jıyntyqty tapsyrý úshin 2 oram jip qajet. Keıbiri aıyna 4-7 jıyntyq tapsyrady. Biz kóterme saýda ornynan bir oramyn 700 teńgege alyp júrmiz. Bir jıyndyqqa 1400 teńge kerek. Bul kóp aqsha emes. Al zeınetkerler men bala kútimimen úıde otyrǵandardyń qınalatyny sózsiz. Olarǵa demeýshiler kómektesedi. Uıymdarǵa, túrli kásiporyndarǵa baryp, «kómektesińizdershi» dep aıtpaımyz. Adamdar bir-birinen estip, bilip, ózderi ıgi iske septigin tıgizýge keledi. Bir kezderi kómek alǵan jas analar balasy ósken soń kelip, bizge demeýshi bolyp júr»,- dedi úılestirýshi.
Aqtóbedegi eki perzenthana alǵashynda klýb jumysyn bir rettik dep oılady. Biraq ýaqyt óte kele baılanys nyǵaıyp, apta saıyn, aı saıyn toqymashylardyń qolynan shyqqan kıimderdi kútedi. Qazirgi kúni aı saıyn 40 jıyntyqqa suranys bar. Toqymashylar da keshiktirmeı kıim jetkizip otyr. 
