Aqtóbede shahmattan jekeleı chempıonat ótip jatyr
AQTÓBE. QazAqparat - Aqtóbede shahmattan erler men áıelder arasyndaǵy jekeleı chempıonattyń jartylaı fınaly bastaldy, dep habarlaıdy QazAqparat tilshisi.
Jarys «Óner ortalyǵy» ǵımaratynda ótip jatyr. Onda sanıtarlyq talap qatań saqtalǵan. El birinshiligine elimizdiń barlyq aımaǵynan 100-ge jýyq sportshy keldi.
Nur-Sultan, Almaty, Shymkent qalalary men oblys chempıonattarynda 1, 2, 3 oryn alǵan sportshylar men 1 shildege deıingi jaǵdaıǵa tıisinshe reıtıngi bar shahmatshylar (2200 erlerde, 1900 áıelderde reıtıng nátıjesi) chempıonatqa qatysýǵa múmkindik aldy.
Ásel Serikbaı, Denıs Mahnev, Nazerke Nurǵalı jáne Ańsat Aldııar, Alýa Nurmanova sııaqty ataqty sportshylar, ulttyq qurama músheleri jartylaı fınalǵa qatysady.
«Chempıonat shveıtsarlyq júıede 9 týrdan turady. Ár oıynshyǵa 60 mınýttan jáne árbir júriske 30 sekýndtan beriledi. Chempıonat jeńimpazdary men júldegerlerine demeýshiler atynan 1 oryn – 150 000 tg, 2 oryn – 100 000 tg, 3 oryn – 50 000 tg kólemindegi qarjylaı syılyq tabystalady. Aqtóbe oblysynyń namysyn Arystanbek Orazaev (halyqaralyq master, ÁCh qola júldegeri, QR chempıony), Kırıll Kýderınov (halyqaralyq master) jáne bolashaǵynan úmit kúttiretin jas sportshylarymyz qorǵaıdy»,- dep habarlady Aqtóbe oblystyq dene shynyqtyrý jáne sport basqarmasynyń baspasóz qyzmeti.
