Aqtóbede «Shaǵala» shıpajaıynyń tárbıeshisi balany súlgimen urǵan
AQTÓBE. QazAqparat – Aqtóbede «Shaǵala» shıpajaıynda em qabyldap jatqan balany tárbıeshi uryp, vıdeo áleýmettik jeli arqyly keń tarap ketti, dep habarlaıdy QazAqparat tilshisi.
Aqtóbede «Shaǵala» shıpajaıyndaǵy oqıǵaǵa baılanysty tekserý bastaldy.
«Bul jaǵdaı 1 naýryz kúni boldy. Balalar uıqydan turǵan soń demalys bólmesine barǵan kezde tárbıeshi ony súlgimen urǵan. Tárbıeshi óz isin moıyndady. Quqyq qorǵaý organdary kelip, qylmystyq is qozǵady. Túsinikteme aldy. Tárbıeshiniń aıtýynsha, tek bir balany urǵan. Sebebi bala balaǵat sóz aıtyp, qarsy sóılegen. Mamanymyz 20 jyl boıy jumys istep keledi. Buryn ondaı qylyǵyn kórmedik», - dedi «Shaǵala» shıpajaıynyń bas dárigeri Serik Jańylsynov.
Shıpajaıda osy oqıǵaǵa baılanysty jınalys ótkizip, balany urǵan jáne ony kórip turyp, esh sheshim qabyldamaǵan mamandy jumystan shettetý týraly sheshim shyǵardy.
«Vıdeo túsirgen balanyń ata-anasy kelip, máseleni aıtty. Oqıǵa demalys kúni bolsa da bári búgin anyqtalyp otyr. Soqqy alǵan bala Qobda aýdanynan kelip, osy jerde em qabyldap jatyr. Munda mantý ekpesi isip ketken balalar jatady. Balanyń jasy 10-da. Aqpan aıynda ǵana shıpajaıǵa keldi», - dedi Serik Jańylsynov. Bas dárigerdiń aıtýynsha, tárbıeshi uryp-soqqan bala eshkimge aryz jazbady.
Aqtóbe oblystyq polıtsııa departamenti baspasóz qyzmetiniń jetekshisi Erbolat Sarqulovtyń aıtýynsha, Almaty aýdandyq polıtsııa bólimi Qylmystyq kodekstiń «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha is qozǵalyp, tergeýdi bastady. Birneshe sot-medıtsınalyq saraptama taǵaıyndaldy.
