Aqtóbede shabyndyq suraǵan sharýadan para alǵan sheneýnik aıyppul tóleıdi
AQTÓBE. KAZINFORM — Yrǵyz aýdandyq jer qatynastar bóliminiń basshysy Medet Berdalın 9 mln teńge aıyppul tóleıdi. Ol sotta para alǵanyn moıyndap, kelisimge keldi.
Yrǵyz aýdandyq sotynda jer qatynastar bóliminiń basshysy Medet Berdalınge qatysty is qaraldy. Sot kabınetindegi is materıalyna súıensek, bıyl tamyz aıynda Nura aýyldyq okrýginiń turǵyny ári sharýa qojalyǵynyń basshysy shabyndyq surap, jer qatynastar bólimine bardy. 1 aıǵa jalǵa berýin ótinip, Medet Berdalınmen jolyqqan. Al sottalýshy naqty qaı jerdi surap turǵanyn, onyń bos nemese ózgeniń ýaqytsha menshiginde ekenin anyqtaý úshin kabınetinde emes, Aqtóbe qalasynda aqyldasýdy jón kóredi. Sóıtip arada birneshe kún ótkende oblys ortalyǵyndaǵy tehnıkalyq qyzmet kórsetý ortalyǵynda júzdesedi. Ótinishti jer komıssııasyna shyǵaryp, óziniń yqpal etýi úshin 300 000 teńge para suraıdy. Sharýa suraǵan somany birden aýdara almaıtynyn, kútýin ótinedi.
Qyrkúıek aıynyń basynda sottalýshy jábirlenýshige áıeliniń uıaly baılanys nómirin jiberip, keıin aýylda kezdesedi. Yrǵyz aýdandyq sotynda jer qatynastar bóliminiń basshysy Medet Berdalın qaıta-qaıta aqsha týraly aıta bergen soń jábirlenýshi Ulttyq qaýipsizdik komıtetiniń Aqtóbe oblysy boıynsha departamentine para talap etý faktisi boıynsha jazbasha aryz jazǵany týraly aıtyldy. Kelisim boıynsha 200 000 teńgeni bólim basshysynyń áıeliniń atyna aýdarady. Óz keziginde sottalýshy jer telimin bólý týraly ótinishti qarap, kómek kórsetedi. Tipti qujattary daıyn bolǵansha sol jerden shóp shabýǵa ruqsat bergen. Al qazan aıynda jábirlenýshi sharýa Ulttyq qaýipsizdik komıtetiniń qyzmetkerleriniń baqylaýymen qalǵan 100 00 teńgeni aýdarady. Sottalýshy Medet Berdalın basty sot talqylaýynda taǵylǵan aıypty tolyq moıyndady. Qylmystyq is qysqartylǵan tártipte qaraldy, sot sottalýshydan jaýap alýmen ǵana shekteldi.
— Medet Berdalın Qylmystyq kodekstiń 366-babynyń 2-bóliginde kózdelgen qylmystyq quqyqbuzýshylyq jasaǵany úshin kináli dep tanylyp, oǵan alǵan paranyń 30 eselengen somasyn, ıaǵnı, 9 000 000 teńge mólsherinde aıyppul jazasy taǵaıyndalsyn. Memlekettik qyzmette, qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organda, memlekettik uıymdarda jáne kvazımemlekettik sektor sýbektilerinde laýazymdardy atqarýǵa ómir boıyna tyıym salynsyn, — dedi sýdıa R.Kydyralın.
Eske salsaq, Shalqar aýdandyq sáýlet, qurylys jáne qala qurylysy bóliminiń basshysy Shuǵa Sádýaqasova para alǵany úshin 7 jylǵa bas bostandyǵynan aıyryldy. Sýdıa Aqtóbe oblysy ákimine jeke qaýly shyǵardy.