Aqtóbede senbi-jeksenbi kúnderi qoǵamdyq kólik júrmeıdi
AQTÓBE. QazAqparat – Aqtóbe qalasynda qoǵamdyq kólik toqtaıdy. Buǵan deıin tótenshe jaǵdaı, karantın kezinde óńirde avtobýstar turaqty júrip turǵan bolatyn, dep habarlaıdy QazAqparat tilshisi.
Aqtóbe oblysynyń bas sanıtar dárigeri shekteý sharalaryn túsindirdi. Onyń aıtýynsha, eki kúnde qalada kóshede erkin júrýge ruqsat berilmeıdi. Tek medıtsınalyq mekeme, zerthana, veterınarııa qyzmeti jumysyn toqtatpaıdy. Sonymen birge kommýnaldyq qyzmet te jumysyn jalǵastyrady.
«Áýejaı men temirjol, janarmaı beketi, kúzet qyzmeti, sýper- gıpermarketter men jetkizý qyzmetine ruqsat bar. Kópqabatty úılerdiń birinshi qabatynda ornalasqan azyq-túlik dúkenderi ashylady. Saýda-logıstıka ortalyǵy, qoıma jabylmaıdy», - dedi oblystyq kásipkerlik basqarmasynyń basshysy Nurhan Tileýmuratov.
Sonymen birge memlekettik organdar men BAQ qyzmetine shekteý joq. Ózgesi senbi-jeksenbide jumysyn toqtatady.
«Ákimshilik shara qoldanbaý úshin tártipke baǵyný qajet. Sebepsiz dalaǵa shyǵýǵa bolmaıdy. Qoǵamdyq tamaqtaný oryndary da jetkizý qyzmetin toqtatady. Qoǵamdyq kólik te júrmeıdi», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Altynbekov.
