Aqtóbede Senat depýtaty saılaýyna úsh kandıdat qatysady
14 qańtar kúni Senat depýttary saılanady.
QR Konstıtýtsııalyq zańynyń 73-babyna sáıkes oblystyq saılaý komıssııasy Qazaqstan Respýblıkasy Parlamenti Senatynyń depýtattyǵyna myna kandıdattardy tirkedi:
Bekbaýova Dana Bahytqyzy 1977 jyly dúnıege kelgen. Qazir Aqtóbe oblysy boıynsha «Atameken» óńirlik kásipkerler palatasynyń dırektory qyzmetin atqarady. Aqtóbe qalasynyń turǵyny ózin-ózi usyndy.
Beknazarov Rahym Aǵybaıuly 1967 jyly dúnıege kelgen. Ol Q.Jubanova atyndaǵy Aqtóbe óńirlik ýnıversıtetiniń ǵylym jáne ınnovatsııa jónindegi prorektory. Kandıdat ózin-ózi usyndy.
Nuǵmanov Amangeldi Shaıhollauly da 1967 jyly dúnıege kelgen. Aqtóbe oblystyq máslıhatynyń hatshysyn kandıdattyqqa Hromtaý jáne Mártók aýdandarynyń máslıhattary usyndy.
Aqtóbe oblystyq saılaý komıssııasy Senaty depýtatyn saılaý boıynsha tańdaýshylardyń tizimin usynady.
Onda ártúrli deńgeıdegi 192 depýtattyń aty-jóni bar.
«Árbir tańdaýshy ózi týraly derekterdi teksere alady. Tizimge enbeı qalǵanyn nemese aty-jóni men ózi týraly qate derekterdiń tirkelgenin kórse, shaǵymdanýǵa quqyly. QR Parlamenti Senatynyń depýtatyn saılaý boıynsha tańdaýshylardyń birlesken otyrysy 2023 jyldyń 14- qańtarda jergilikti ýaqyt boıynsha saǵat 10:00-de (tirkelý saǵat 08:00-den bastap), Aqtóbe qalasy Ábilqaıyr han dańǵylyndaǵy 90/b mekenjaıynda ornalasqan «Óner ortalyǵy» ǵımaratynyń konferents-zalynda ótedi. Qazaqstan Respýblıkasynyń saıası partııalary, ózge de qoǵamdyq birlestikteri men kommertsııalyq emes uıymdary, sondaı-aq buqaralyq aqparat quraldary daýys berý kúni baıqaýshylardyń (ókilderiniń) qatysatyny týraly aldyn ala habarlaýy suralady», - dedi Aqtóbe oblystyq aýmaqtyq saılaý komıssııasynyń tóraǵasy Nurlybek Júsipov.
Eske salsaq, buǵan deıin Aqtóbede bes úmitker ótinish berdi. Resmı tirkelgeni úsheý ǵana.
