Aqtóbede selden zardap shekken aýyldy kóshirý úshin turǵyndardyń kelisimi kerek
AQTÓBE. QazAqparat - Aqtóbede sý tasqynynan zardap shekken Mahambet aýylynyń turǵyndaryn kóshirý úshin biraýyzdan kelisim kerek. Bul týraly oblys ákimi Berdibek Saparbaev esep berý kezdesýinde aıtty, dep habarlaıdy QazAqparat tilshisi.
Aqtóbede 2017 jyly sý tasqyny bolyp, júzdegen úıdiń turǵyndary baspanasyn tastap, ýaqytsha oryndarǵa qonystanǵan bolatyn. Sol kezde Mahambet aýylynyń turǵyndaryn túgel kóshirý týraly usynys qaralyp, Úkimet komıssııasy jumys istedi. Turǵyndar osy máseleniń sheshimin oblys ákiminen surady.
«Mahambet, Vohr aýylynyń jaǵdaıyn jaqsy bilemiz. Demeýshilerdiń kómegimen sý tasqynynan soń 120 úı salyndy. Al Mahambet aýylyn túgel kóshirýdi oıǵa alǵan edik. Úkimettiń arnaıy komıssııasy kelip qarady. Tek turǵyndardyń bári birigip, qujat jınap, biraýyzdan kóshýge kelisim berýi tıis bolatyn. Biraq kelisim berilmeı, qujat daıyndalmady. Másele sol kúıi ashyq tur. Bul jerde turýǵa bolmaıdy. Aýasy nashar, úıleriniń qurylysy durys emes. Qujat rettelse, basqa jerge kóshirý is-sharasy qoldanylady», - dedi Aqtóbe oblysynyń ákimi Berdibek Saparbaev.
