Aqtóbede seksýaldyq zorlyq kórgenin aıtqan mektep oqýshysynyń otbasy býllıngke ushyrady
AQTÓBE. KAZINFORM - 15 jastaǵy oqýshynyń ata-anasy, baýyrlary polıtsııaǵa shaǵym túsirip jatyr. Olar aýyl ishindegi jaǵdaıǵa alańdaýly.
Aqtóbe oblysy Qarǵaly aýdanyndaǵy aýyldardyń birinde bolǵan oqıǵa boıynsha sot aldy tergeý jumysy jalǵasyp jatyr. Al oqýshy qyzdyń ata-anasy men baýyrlary ózderine qarsy býllıngtiń bastalyp ketkenin aıtyp, dabyl qaqty.
- Meniń 15 jastaǵy sińlime eresek adamdar qysym, býllıng jasalyp jatyr. Aýylǵa blogerdi shaqyrǵan. Ózderi jáne olardyń týystary bizdiń qyzdy balaǵattap, jaman sózder aıtqan. Ony túnde kórip, barlyq otbasymyzben uıyqtaǵan joqpyz. Qyz úıden qashyp ketip, ózine qol jumsaǵysy keldi. Ol kishkentaı, ne isterin ózi bilmeıdi. Býllıngke qatysty shaǵym túsiremiz. Bizdiń áýlettiń, otbasymyzdyń abyroıyn jerge taptap otyrǵan adamdardy, eshkimdi keshirmeımiz. Bárinen ádiletti, zań túrinde jaýap alamyz,- dedi jábirlenýshiniń apasy Aqmaral Ájǵalıeva.
Qorǵaýshynyń aıtýynsha, is Qylmystyq kodekstiń 120-baby 3-1 bóligi boıynsha saralanǵan. Sondaı-aq býllıngke qatysty aryz túsirdi.
Aqtóbe oblystyq PD baspasóz qyzmeti tek resmı aqparatqa senýge shaqyrdy.
- Atalǵan fakti boıynsha sotqa deıingi tergep-tekserý júrgizilip jatyr. Kúdikti ustalyp, sottyń sanktsııasymen qamaýǵa alyndy. Qazirgi ýaqytta qylmystyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. Polıtsııa departamenti azamattardy tek resmı aqparat kózderine senýge, qaýesetter men rastalmaǵan málimetterdi taratýdan bas tartýǵa shaqyrady. Qazaqstan Respýblıkasynyń qoldanystaǵy zańnamasyna sáıkes, kórineý jalǵan aqparat taratý, sondaı-aq sotqa deıingi tergep-tekserý derekterin jarııa etý qylmystyq jaýapkershilikke ákep soǵatynyn eske salamyz,- dedi polıtsııanyń baspasóz qyzmeti.
Eske salsaq, Aqtóbede 22 jastaǵy jigit mektep oqýshysyn zorlady degen kúdikke ilikti. Kúdikti ustalyp, ýaqytsha tergeý ızolıatoryna qamaldy.
