Aqtóbede Sazdy, Jińishke jáne Peschanka ózenderiniń arnalary tazartylady
Oblys basshylyǵy sý tasqynyna qarsy jol kartasynyń júzege asyrylýyna baılanysty máseleni erekshe baqylaýda ustap otyr. Óńir úshin bul baǵyt 2022 jylǵy kóktemgi sý tasqynynan keıin ózekti bolyp otyr.
E. Toǵjanov: «Halyqtyń qaýipsizdigin qamtamasyz etý - negizgi másele. Biz 2017 jylǵy sý tasqynynyń sebep-saldaryn zerttep, osy jylǵy jaǵdaıdy zerdeledik, sarapshylarmen keńesip, ózen arnalarynyń birneshe shaqyrymyn tazartýǵa kirisemiz dep sheshtik. Barlyq jaýapty organdarǵa tıisti tapsyrmalar berildi»,- dep atap ótti.
Óńir basshysy Sazdy sý qoımasyn boılaı ósip, kóktemde aǵysqa kedergi bolatyn qamystan arnaıy tehnıkamen tazartýdy tapsyrdy.
Sol sııaqty, Aqtóbe-Orsk tasjolyn kesip ótetin kópir aýdanyndaǵy Peschanka ózeniniń arnasyna da qamys pen aramshóp ósip ketken. Peschanka ózeni bıyl kóktemde 1993 jyldan beri alǵash ret kóterildi. Al qazir sýy tartylyp, qurǵap jatyr.
Aldaǵy kóktemde bıik ósken shóp erigen qar sýynyń aǵysyna kedergi bolýy múmkin. Osyǵan baılanysty, oblys ákimi keminde júz adamdy jumyldyra otyra ózen arnasyn tazartýǵa jedel kirisýdi tapsyrdy. Jumys osy aptanyń ishinde aıaqtalýy tıis.
Sondaı-aq, ótken kóktemde másele týǵyzǵan Jińishke ózeni de oblys ákiminiń nazarynan tys qalmady.
Jeńis dańǵyly aýdanyndaǵy Jińishke ózeni ústimen ótetin kópirdi jóndep bitirgen soń munda kóne kópirdi buzý josparlanyp otyr: turǵyndar osy suraqty birneshe ret kóterip, onyń adam ómiri úshin qaýipti ekenin aıtqan.
Oblys ákimi ózen arnalaryn tazartý maqsatynda uıymdastyrylatyn sharalardan bólek, Elek ózeniniń jaǵasy (Naberejnyı kóshesi tusynda) abattandyrylyp, turǵyndar demalatyn aımaqqa aınalady dep kútilip otyrǵanyn jetkizdi.
E. Toǵjanov: «Jalpy, Aqtóbe qalasy arqyly ótetin alty ózenniń arnasyn tazartý, túbin tereńdetip, jaǵasyn bekitetin joba túzetýdi qajet etedi. Qazir jobalyq-smetalyq qujattama túzetý engizý úshin ortalyq memlekettik organdarǵa kelisimge jiberilgen. Onyń qorytyndysyn kútip otyrmyz. Joba jańartylýy kerek. 2023 jyldyń kókteminde turǵyndarǵa qaýip týǵyzbas úshin sý basý múmkindigin tómendetý sharalaryn qabyldap jatyrmyz.
Negizi kóktemge daıyndyq qazir bastalǵany jón, qys aılarynda mundaı jumystardy jasaýǵa aýa raıy qolaısyz, al kóktemde tym kesh bolýy múmkin. Osy aptada Sazdy sý qoımasy, Jińishke jáne Peschanka ózenderi boıynsha naqty sheshimder qabyldaýymyz kerek.
Halyqty sý tasqynynyń aldyn alý boıynsha júrgizilip jatqan sharalardan tolyq habardar etip otyratyn bolamyz»,- dep sózin túıindedi.
