Aqtóbede saıajaı úıleri men qurǵaq shóp órtenip jatyr

Aqtóbe oblystyq TJD baspasóz qyzmetiniń habarlaýynsha, órtti sóndirýge TJD kúshteri men quraldary, «Aýyl qutqarýshylary» órt sóndirý beketiniń qyzmetkerleri, sondaı-aq jergilikti atqarýshy organdar jumyldyryldy.

- Barlyǵy shamamen 85 adam jáne 20-dan astam arnaıy tehnıka tartylǵan. Órt ornynda jumyldyrylǵan barlyq qyzmetterdiń is-qımylyn úılestirý úshin jedel shtab quryldy. Shtab jumysyn, kúshter men quraldardyń ózara is-qımylyn TJD bastyǵynyń orynbasary úılestiredi. Qutqarýshylar órtti oqshaýlaý jáne tolyq sóndirý boıynsha qajetti sharalardy qabyldap jatyr, dep habarlady baspasóz qyzmeti.

Alǵa aýdanynyń ákimi Aslanbek Súıinshalıevtiń habarlaýynsha, munda adamdar jaz mezgilinde kelip, baý-baqsha egedi.

- Adamdar turaqty turmaıdy. Jazǵy ýaqytta 50-ge jýyq ýchaske ǵana ıgeriledi. Adamdar kúndiz baryp, baqshasyn sýaryp, Alǵa qalasyndaǵy úılerine qaıtady. Jalpy baý-baqsha úıleriniń 95%, qańyrap tur. Ieleri bir kezderi tastap ketken,- dedi ol.

Aıta keteıik, Qaraǵandy oblysynda bir táýlikte 280 gektar aýmaqtaǵy 4 tabıǵı órt sóndirildi. Órtterdi sóndirý jumystary jer bederiniń keıbir ýchaskeleriniń qoljetimsizdigi jáne jeldiń ekpini saldarynan qıyndady.