Aqtóbede saıajaı aýmaǵyndaǵy 40 ga jer órtendi
AQTÓBE. QazAqparat -Aqtóbede Kirpishti aýdanyndaǵy saıajaıdan órt shyqty, dep habarlaıdy QazAqparat tilshisi.
Aqtóbedegi Kirpishti aýdanynda Zelenyı, Zelenaıa dolına, Kırpıchnık, Golýboı ogonek, Gúlder jáne Gaýhar baý-baqsha ujymdarynda aǵash pen úıler órtendi. Aýmaǵy 40 ga jetti.
«Qurǵaq shóp pen aǵashtar janyp,barlyǵy 37 adam qaýipsiz jerge shyǵaryldy. Órtti sóndirýge 150 adam men 16 tehnıka jumyldyryldy», - dep habarlady qalalyq tótenshe jaǵdaılar basqarmasynyń baspasóz qyzmeti.
Eshkimge medıtsınalyq kómek kórsetilgen joq, degenmen adamdar jalǵyz baspanasynan aıyryldy. Órtti sóndirýge zaýyttan, áýejaıdan, Áýe qorǵanys kúshteri áskerı ınstıtýty men orman sharýashylyǵynan adamdar jáne tehnıka jumyldyryldy.
«Eki kún buryn saıajaıdaǵy úıdiń shatyryn jaýyp, edenin tósedim. Órt shyqqan kezde bári kúlge aınaldy. Qazirgi shyǵynymyz 350 myń teńge boldy», - dedi saıajaı turǵyny Berik Aqsholaqov.
Baý-baqsha ujymdarynda jemis aǵashtary da janyp ketken. Aǵashpen qorshalǵan aýla da kúlge aınaldy.
«Ázirge órttiń shyǵý sebebi belgisiz. Bireý dánekerleýshilerdiń isi dep otyr. Biraq naqty qashan bastalǵanyn da bilmeı otyrmyz», - dedi Zelenyı baý-baqsha ujymynyń basshysy Vladımır Odnonozdrev.
