Aqtóbede saıajaı aýmaǵyn sý basty
AQTÓBE. QazAqparat - Aqtóbe qalasyndaǵy mal bazaryna barar joldaǵy saıajaıdy sý basty. Qazir bul aýmaqta arnaıy shtab jumys istep jatyr, dep habarlaıdy QazAqparat tilshisi.
Aqtóbe qalasy mańyndaǵy saıjaı úıleri sý astynda qaldy. Keshkilik qar sýy kúrt kóterilip, sýdyń aǵyny kúsheıgen. Oqıǵa ornyna shtab jetip, ekskavator qazý, jyralardy keńeıtý jumystaryn júrgizip jatyr.
«Bul jer buryn sýǵa ketken emes. Ótken jyly dál osylaı sý aqty, bıyl qaıtalanyp tur. Sebebi, qysta qala ishindegi qar shyǵarylyp, mal bazary mańyna jınaldy. Qar kóktemde erip, sý tasyp jatyr. Alǵashqy kezde tótenshe jaǵdaılar qyzmeti kelip, baqylap turdy. Keıin ekskovator jyrany keńeıtip, saıajaı men qalanyń ortasyndaǵy qatynas buzyldy», - dedi aýyl turǵyny Aıbek. Saıajaı turǵynynyń aıtýynsha, ázirge qansha úıdi sý basqany belgisiz.
Qazirgi ýaqytta tótenshe jaǵdaılar qyzmeti oqıǵa ornynda saıjaı aýmaǵynda turatyn halyqqa kómek kórsetip jatyr. Kóbi jumystan shyqqan soń úılerine jete almaı, orta jolda qalǵan. Olardy arnaıy aýyr tehnıka arǵy betke ótkizip, saıajaıdan qalaǵa keletinderdi qar sýynyń ekinshi jaǵyna tasyp jatyr.
