Aqtóbede saıabaq jumysshylary jalaqylaryn ala almaı júr
Jumysshylar áleýmettik jeli arqyly maýsym aıynan beri jalaqylaryn ala almaı júrgenderin jazdy. Saıabaq dırektory Ádilbek Islamov bul aqparatty rastady.
«Jumysshylar aǵashtardy kútip ustaý, sýarý, tazalyq, kúzet jumystaryn júrgizdi. Olardyń jáne meniń de maýsym aıynan beri jalaqy ala almaı júrgenimiz ras. Maýsym, shilde aılarynyń jalaqysy kelisim boıynsha osy aptanyń basynda berilýi tıis edi. Biraq áli aqsha joq. Búgin qalalyq ákimdikte taǵy jıyn ótti. Tuńǵysh Prezıdent atyndaǵy saıabaqta 38 adam eńbek etedi. Bas merdiger - «Aqjol LTD» kompanııasy, qosalqy merdiger - bizdiń saıabaq. Qazir eki aıdyń qaryzy 4 mıllıon teńge jetti», - dedi Ádilbek Islamov.
Al basty tapsyrys berýshi Aqtóbe qalalyq ákimdiginiń turǵyn úı-kommýnaldyq sharýashylyq bólimi qyzmet kórsetýshilerge mamyr men maýsym aılarynyń aqysyn shildede aýdarǵan.
«Kóktem aılarynyń sońynda ákimdik tarapynan qarjy aýdarý keshiktirildi. Biraq qazir mamyr jáne maýsym aıynyń qarjysy tolyq aýdarylǵanyn aıta alamyz. Al bas merdigerdiń ne sebepten jumysshylaryna jalaqy bermeı otyrǵany belgisiz. Jýyrda memlekettik mekemeden shilde aıynyń qarjysy da aýdarylýy tıis», - dedi qala ákiminiń baspasóz jetekshisi Qambar Muqashev.
Aıta keteıik, bas merdiger «Aqjol LTD» kompanııanyń ınjeneri Aıbek Erjanovtyń aıtýynsha, qazir salyq tóleıtin shot ýaqytsha buǵattalǵan.
«Qalalyq turǵyn úı-kommýnaldyq sharýashylyq mekemesi mamyr aıynan bastap aqsha aýdarýdy keshiktirdi. Mamyr, maýsym aıynyń aqshasy shilde aıynyń orta tusynda tústi. Qazir bizge shilde aıyn aýdarýy tıis. Taıaý kúnderi shot qaıta jumys istep, biz qarjy aýdaramyz. Naqty kúnin aıta almaımyz», - dedi Aıbek Erjanov.
