Aqtóbede saýda úıindegi órttiń shyǵý sebebi tekserilip jatyr
AQTÓBE. QazAqparat – Aqtóbede saýda úıindegi órtti sóndirýge 13 tehnıka men 46 adam jumyldyrylǵan. Qazirgi kezde órttiń shyǵý sebebi tekserilip jatyr, dep habarlaıdy QazAqparat tilshisi.
Keshe túnde Aqtóbedegi «Tursyn» saýda úıinen órt shyqty .
Munda shaqyrtý saǵat 21:30-da túsken.
Órt sóndirýshiler oqıǵa ornynan bes mınýtta jetken. Sebebi bul jerde japsarlas ornalasqan ǵımarat kóp, aýdany - úlken.
Jedel shtab qurylyp, órt sóndirýshiler ekige bólinip jumys istedi.
«Barlyǵy 13 tehnıka men 46 adam jumyldyryldy. Alǵashynda birinshi qabattan órt shyǵyp jatyr dep oıladyq. Otty sóndirý kezinde ekinshi qabattyń da janǵany anyqtaldy», - dedi Aqtóbe qalalyq TJB bastyǵy Aıbat Jańabergenov.
Órt saǵat 22:17-de tolyq sóndirildi. Negizinen azyq-túlik janyp, saýda pavılondary búlindi. Qazir órttiń shyǵý sebebi tekserilip jatyr.
Saýda úıi ýaqytsha jumysyn toqtatty. Munda elektr togy men gaz ajyratyldy.
