Aqtóbede saýalnama kezinde óz-ózine qol jumsaýǵa beıim oqýshylar anyqtaldy
AQTÓBE. QazAqparat - Aqtóbe qalasynyń 12 myń oqýshysy arnaıy test tapsyryp, olardyń ishinen óz-ózine qol jumsaýǵa beıim jasóspirimder anyqtaldy, dep habarlaıdy QazAqparat tilshisi.
Aqtóbe qalasy boıynsha oqýshylar arasyndaǵy qylmys azaımaı tur. 2017 jyldyń 6 aıynda 9 mektep oqýshysyna qatysty 7 qylmys tirkelse, 2018 jyldyń 6 aıynda 7 mektep oqýshysy 7 qylmys jasady. 2017-2018 jyldary óz-ózine qol jumsaýǵa beıim oqýshylardy anyqtaý maqsatynda arnaıy testileý júrgizildi. Buǵan deıin habarlaǵanymyzdaı, senim telefony da iske qosylyp, psıhologtar jumysyn kúsheıtti.
Degenmen, joǵary synyp oqýshylary qatysqan testiniń nátıjesi máz emes.
«Qaladaǵy 77 orta mekteptiń 12 myńnan astam oqýshysy testileýge qatysty. Saýalnamaǵa 14-16 jastaǵy balalar tańdap alyndy. Nátıjesinde 183 bala táýekel tobyna kirse, onyń 66-sy - asa qaýipti jaǵdaıda. Bul balalar ata-analarymen birge qaladaǵy emhanalarǵa, jalpy tájirıbeli dárigerlerge jiberildi»,- dedi Aqtóbe qalalyq bilim bóliminiń basshysy Aısáýle Jaqsybaeva.
