Aqtóbede sarmat jaýyngeriniń buıymdary restavratsııalanyp jatyr
Ótken jyldyń qazan aıynda Temir aýdanynyń Tasqopa aýylyndaǵy qorymnan tabylǵan sarmat kóseminiń qorǵany men altyn buıymdardy zerttep, qalpyna keltirýdiń birinshi kezeńi aıaqtaldy. Bul jóninde Á.H. Marǵulan atyndaǵy arheologııalyq ınstıtýttyń bas dırektory Baýyrjan Baıtanaev Aqtóbe oblysynyń ákimi Ońdasyn Orazalınmen kezdesýinde málimdedi.
«Rýhanı jańǵyrý» baǵdarlamasy arqyly júzege asyrylyp jatqan zertteý jobasyna 7 ǵylym kandıdaty, 4 ǵylym doktory, 2 akademık jumyldyrylǵan. Jobany zertteý 3 kezeńnen turady. Tarıhı jádigerler tolyq zerttelgen soń Aqtóbe oblystyq tarıhı- ólketaný mýzeıine tapsyrylyp, kópshilik nazaryna usynylmaq. Ońdasyn Orazalın ınstıtýt dırektoryna zertteýdiń ekinshi kezeńin júıeli jalǵastyrýdy, sarmat jaýyngeriniń buıymdaryn restavratsııalaýdy aldaǵy jyldyń kókteminde aıaqtaýdy tapsyrdy. Sonymen birge ınstıtýt «Aqtóbe oblysynyń kıeli jerler geografııasy» ǵylymı baǵdarlamasy aıasynda jeti iri ǵylymı - zertteý jobasyn iske asyryp jatyr.
Eske salsaq, Tasqopa aýylynda buryn qala bolǵan. Tabylǵan buıymdar bir jyl boıy zertteldi.
