Aqtóbede sarbazdyń qabyrǵasyn syndyrǵan áskerı qyzmetshi sottaldy
AQTÓBE. KAZINFORM – QR Ulttyq ulany 5548 áskerı bóliminiń ekinshi jedel maqsattaǵy batalony 5 jedel maqsattaǵy rotasynyń starshınasy 1 jylǵa bas bostandyǵynan aıyryldy. Jábirlenýshi sarbazǵa moraldyq zalaldy jáne zańdy ókil shyǵynyn tóleıdi.
Qylmystyq is Aqtóbe garnızony áskerı sotynda qaraldy. QR Ulttyq ulany 5548 áskerı bóliminiń ekinshi jedel maqsattaǵy batalony 5 jedel maqsattaǵy rotasynyń starshınasyna Qylmystyq kodekstiń 451-baby 1-bóligimen aıyp taǵyldy ıaǵnı bılikti asyra paıdalanǵany úshin jaýapqa tartyldy. Іs materıalyna súıensek, oqıǵa bıyl qańtar aıynda bolady.
Sottalýshy S.Qasymov Jańaózen qalasynda ornalasqan QR Ulttyq Ulany 5548 áskerı bóliminiń tórtinshi rotasy ornalasqan ǵımarat ishinde jeke quramdy sapqa turǵyzady. Keıin «shaıqas» pármenin berip, balaǵat sózder aıtyp, jattyǵý jasap jatqan merzimdi áskerı qyzmetshiniń qabyrǵa tusynan úsh ret tebedi. Sol kezde áskerı qyzmetshiniń jetinshi qabyrǵasy synǵan.
Sottalýshy S. Qasymov taǵylǵan aıypty moıyndamady. Ol besinshi rota áskerı qyzmetshileriniń ózara daýlasyp, talasyp jatqanyn kórip, sapqa turǵyzǵanyn, óziniń urmaǵanyn aıtty. Tipti jábirlenýshi jala jaýyp otyrǵanyn jetkizdi. Al jábirlenýshi bolsa alǵashynda bárin jasyrǵan, arada eki apta ótkende qan túkirgen. Tereń demalǵan kezde qabyrǵasy aýyryp, feldsherge barady, anasyna da habar beredi. Osy aralyqta bul jaıt áskerı bólim komandırine jetedi. Áskerı-tergeý basqarmasynyń qyzmetkerleri tergeý júrgizedi.
Sot kabınetindegi aqparatqa súıensek, oqıǵa bolǵan bólmeniń kireberisine beınebaqylaý kamerasy ornatylǵanymen, jazba júrgizilmegen. Sebebi birer aı buryn ózge qylmystyq is boıynsha tergeý júrip, jazbany alýǵa múmkindik bolmaǵan.
Sot úkimimen sottalýshy Qylmystyq kodekstiń 451-baby 1-bóligimen kináli dep tanylyp, 1 jylǵa bas bostandyǵynan aıyrý jazasy taǵaıyndaldy. Jazasyn qylmystyq-atqarý júıesiniń qaýipsizdigi barynsha tómen mekemesinde óteıdi. Sonymen birge jábirlenýshiniń azamattyq talap aryzy ishinara qanaǵattandyrylyp, 700 000 teńge moraldyq zııan, 900 000 teńge ókil qyzmetine jumsalǵan sot shyǵyny óndirildi.
Eske salsaq, Almaty garnızonynyń áskerı sotynda Taldyqorǵan garnızonyndaǵy áskerı bólimderdiń birinde merzimdi áskerı qyzmet ótkergen sarbazdyń qaza bolý faktisine qatysty qylmystyq isti qaraý aıaqtaldy. Sarbaz ólimine baılanysty batalon komandıriniń orynbasary 4 jylǵa sottaldy.
