Aqtóbede saraptama komıssııasy lıftterdi tekserýdi bastady
AQTÓBE. QazAqparat -Aqtóbe qalasyndaǵy barlyq lıft tekseriledi. Saraptama komıssııasy búgin jumysyn bastady, dep habarlaıdy QazAqparat tilshisi.
Aqtóbe qalasynda lıftterdi tekserý jumysy bastaldy. Búgin komıssııa músheleri 5 yqsham aýdandaǵy kópqabatty turǵyn úılerdiń lıft jumysymen tanysty.
«Tekserý bastaldy. Aqtóbe qalasyndaǵy 129 kópqabatty úıdegi 280-nen astam lıfttiń qoldaý merzimi 25 jyldan asqan. Bárin qaraımyz. Komıssııa quramynda turǵyn úı ınspektsııasy, jaýapty mamandar bar. Biz qujattaryn qaraımyz, tehnıkalyq negizdemesi tekseriledi. Sheshim tekserýden soń shyǵarylady»,- dedi Aqtóbe oblystyq energetıka, turǵyn úı-kommýnaldyq sharýashylyq basqarmasy, óndiristik-tehnıkalyq bólim basshysy Samat Lepesov. Bul memlekettik mekeme lıftterdi tirkep, qoldanystan shyǵarý qujattaryn ǵana qabyldaıdy. Biraq tekserý mekemeniń quzyryna kirmeıdi.
«Men basqaratyn páter ıeleri kooperatıvinde 6 lıft bar. Lıftterdiń bári jumys isteıdi, biraq qandaı da bir shara qoldaný kerek. Erte me, kesh pe, buzylady. Qaıǵyly oqıǵa kez kelgen ýaqytta qaıtalanýy múmkin»,- dedi páter ıeleri kooperatıviniń tóraǵasy Murat Tabynbaev.
Lıft jumystaryn tótenshe jaǵdaılar qyzmeti tekserip shyqqan. Sol kezde Aqtóbe qalasy boıynsha barlyq lıft ýaqytsha toqtatyldy. Joǵary qabatta turatyn qarııalar óz qarsylyǵyn bildirgen.
«Komıssııa barlyq lıftini toqtatý kerek dep otyr. Endi lıftterge qyzmet kórsetetin mekemelerge baryp, hat jazamyz. Olardyń shyǵarǵan sheshimin ákimdikke beremiz. Shyn máninde lıftter 30 jyldan beri jumys istep tur. Qoldaný merzimi ótti. Jańasyn alý múmkin emes. 7-8 mıllıon teńgeni turǵyndar tóleı almaıdy»,- dedi Murat Tabynbaev.
Aıta keteıik, Aqtóbe qalasyndaǵy kópqabatty turǵyn úılerdiń birindegi lıftte qaıǵyly oqıǵa tirkelip, 28 jastaǵy jýrnalıst qaza boldy.
Keıin qaladaǵy eski lıft ýaqytsha jumysyn toqtatty.
