Aqtóbede sapaly jol úlesi 72 %– ákim esebi

NUR-SULTAN. QazAqparat – Aqtóbe oblysynyń ákimi Ońdasyn Orazalın óńirdegi jol sapasy men jóndeý jumystary týraly aıtyp berdi, dep habarlaıdy QazAqparat tilshisi.

«Aqtóbe oblysynyń úlken kólik toraby jáne kólik haby retinde damýǵa áleýeti zor. Bul rette, turǵyndar, kásipkerler men óndiris mekemeleri tarapynan óńirdegi avtojol sapasyna narazylyqtary bar. Aıta ketý kerek, basqa óńirlermen salystyrǵanda Aqtóbede qanaǵattanarlyq jol úlesi o basta óte tómen boldy – 2011 jyldary, osydan 10 jyl buryn 43% nemese respýblıkadaǵy 16-orynda boldy. Atalǵan máseleniń mańyzdylyǵyn eskere otyryp, áleýmettik-saıası turǵydan da úlken problemaǵa aınalyp kele jatqanyn túsinip, osy jaǵdaıdy túzetý úshin tıisti sharalardy jasap kelemiz», - dedi O. Orazalın Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha, 2011-2018 jyldary joldardy jóndeýge 36 mlrd teńgege jýyq qarajat jumsalyp, jergilikti joldardyń jaqsy jaǵdaıdaǵy úlesi taǵy 11% artqan.

«Sońǵy 3 jylda shamamen dál osyndaı kólemde qarajat bólip, (36,7 mlrd teńge) jaqsy jaǵdaıdaǵy joldar úlesin 14% ulǵaıta aldyq. Birinshiden Úkimettiń qoldaýymen respýblıkalyq bıýdjetten qarjy berildi, oǵan qosa dál sondaı kólemde parıtettik negizde jergilikti bıýdjetten qarajat bólindi. Al ústimizdegi jyly barlyq kezeńmen salystyrǵandaǵy eń aýqymdy qarjy – 34 mlrd teńge qarastyryldy. Onyń ishinde 20,6 mlrd teńgege jýyǵy jergilikti joldardy jóndeýge, al 14 mlrd teńgesi – kóshelerdi jóndeýge jumsalady», - dedi óńir ákimi.

Jalpy bıyl 600 shaqyrymnan astam joldardy jóndeý josparlanǵan. Nátıjesinde jaı-kúıi qanaǵattanarlyq jergilikti jol úlesi bıyl 66,7%-ten 72%-ke deıin jaqsartylady.

«Biraq bastapqy jaǵdaıymyz óte tómen bolǵandyqtan, 72 paıyzǵa jetsek te respýblıka boıynsha áli de eń sońǵy qatarda bolatynymyz anyq. Sondyqtan bul jumysty qarqyndy turde jalǵastyramyz», - dedi Ońdasyn Orazalın.