Aqtóbede samokatty jalǵa berý bıznesin uıymdastyrǵan muǵalim sottaldy

AQTÓBE. KAZINFORM – Zeınetker men muǵalim aqtóbelikterdi onlaın tabys tabýǵa úgittep, sendirgen. Keıin onyń qarjy pıramıdasy ekeni anyqtaldy.

№2 Aqtóbe qalalyq sotynda zeınetker I. Jolaman men orta mekteptiń matematıka páni muǵalimi B.Nurgúlge qatysty qylmystyq is qaraldy. Eki sottalýshyǵa da Qylmystyq kodekstiń «Qarjy (ınvestıtsııalyq) pıramıdasyn qurý jáne oǵan basshylyq etý», «Qylmystyq jolmen alynǵan aqshany jáne ózge múlikti zańdastyrý» baptary boıynsha aıyp taǵyldy. 

Іs materıalyna súıensek, sottalýshy I.Jolaman buryn zańger bolyp jumys istegen. 2024 jyly qosymsha tabys tabýdy josparlap, áleýmettik jeli arqyly «onlaın jumys» siltemesin basady.

Ózin Ivan dep tanystyrǵan beıtanys adam «Harmony Rider Technology» kompanııasyna shaqyrady. I.Jolaman B.Nurgúlmen aldyn ala kelisip, qarjy pıramıdasyn qurady. 

AQSh-tyń Kolorado shtatynda tirkelgen kompanııa elektr samokat shyǵaratynyn, ony jalǵa berip, aqsha tabýǵa bolatynyn aıtyp sendiredi. Sóıtip birneshe ret semınar ótkizip, adamdarǵa tabys tabý jolyn úıretedi. Ol úshin «HRT» kompanııasynyń qosymshasyn tirkep, onlaın elektr samokat alady. Eger jańa klıent taýyp, tirkese bonýs beriledi.

Aqsha qosymshadaǵy jeke kabınetke túsedi. Sot kabınetindegi aqparatqa súıensek, «USDT» - 1 dollarǵa teń. Keıin ony «OKX» krıptobırjasy arqyly aqshaǵa aýdarýǵa bolady. 2024 jyldyń naýryz-jeltoqsan aılary aralyǵynda jábirlenýshiler 197 mln teńge aqsha salǵan. 

Sot úkimimen I.Jolaman 6 jylǵa bas bostandyǵynan aıyryldy. Múlki tárkilendi. Sottalýshy B.Nurgúl 5 jylǵa bos bostandyǵynan aıyryldy. Ekeýi de qarjy salasynda 7 jyl boıy qyzmet ete almaıdy. Sonymen birge sot jábirlenýshilerdiń keıbiriniń azamattyq talap aryzyn qanaǵattandyrdy.

Aıta keteıik, Qaraǵandyda «Úmit Samǵaý» qarjy pıramıdasyn uıymdastyrǵandar tergelip jatyr. Atalǵan kompanııa óz qyzmetin jalǵyzbasty analarǵa, kópbalaly jáne turmysy tómen otbasylarǵa kómek kórsetetin qaıyrymdylyq jobasy retinde kórsetken.

Azamattarǵa salǵan qarajatynyń 300 paıyzdan 800 paıyzǵa deıin tabys ákeletini jóninde ýáde berilip, ártúrli «salym túrleri» usynylǵan. Joba sharttary boıynsha salym kólemi neǵurlym joǵary bolsa, tabys ta soǵurlym kóp bolatyny aıtylǵan.