Aqtóbede salynatyn aýtızm ortalyǵyna úzdik mamandar tartylmaq
Qurylysty memlekettik-jekeshelik seriktestik aıasynda metsenat Bolat Ótemuratovtyń qaıyrymdylyq qory júrgizedi.
Aqtóbe oblysynda 24 myńnan astam múgedek bar. Onyń 3 myńnan astamy bala. Qazirgi kezde óńirde birneshe ońaltý ortalyǵy jumys istep tur. Biraq áli de balalarmen jeke jumys isteıtin kásibı ortalyqtar qajet. Múgedek balalary bar ata-analar men arnaıy qoǵamdyq uıymdar bul máseleni Aqtóbe oblysynyń ákimi Berdibek Saparbaevqa aıtyp, kómek suraǵan bolatyn . Óńir basshysy metsenat Bolat Ótemuratovtyń «Asyl Mıras» qaıyrymdylyq qory dırektorymen kezdesip, memorandýmǵa qol qoıdy. Kelisimge sáıkes qurylysty qaıyrymdylyq qory júrgizedi. Jańa ortalyq memlekettik-jekeshelik seriktestik aıasynda salynady.
«Aqtóbe oblysynda aýtızm dıagnozy bar 217 bala turady. Bizdiń mindetimiz - olarǵa jáne olardyń ata-anasyna barynsha kómektesip, qoldaý kórsetý», - dedi óńir basshysy Berdibek Saparbaev.
Qurylys jumystaryna aýtızm dertine shaldyqqan balalardyń ata-analary da qatysady. Olar balalardyń densaýlyǵyna tıimdi usynystaryn aıtyp, qajetti keńes bere alady. Memlekettik organ, ata-analar men qurylys kompanııalary arasynda qarym-qatynas ornaıdy.
Aıta keteıik, «Asyl Mıras» qaıyrymdylyq qory 2015 jyly «Aýtızm. Barshamyzǵa bir álem» baǵdarlamasyn tanystyrǵan bolatyn. Aýtızmmen aýyratyn balalarǵa ońaltý ortalyǵyn salý sol baǵdarlama jobalarynyń biri boldy. Qazirgi kezde Almaty, Astana, Qyzylorda men Óskemen qalalarynda arnaıy ortalyqtar jumys istep tur.
«Baǵdarlama Qazaqstanda aýtıstik spektr aýytqýshylyǵy bar balalarǵa kómek kórsetýdiń ozyq júıesin engizýge baǵyttalǵan. Biz osy joba aıasynda 15 jasqa deıingi balalarmen jumys isteımiz. Ókinishke qaraı eresekterge mundaı jaǵdaı jasaý múmkin bolmaı otyr. Biraq bul qordyń aldaǵy josparynda bar. Beıresmı derekterge súıensek, elimizde aýtızmmen aýyratyn balalar qatary kóbeıip keledi, ókinishtisi, olardyń sany dúnıejúzinde de artyp otyr. Sondyqtan qor osy máselemen aınalysýdy uıǵardy»,- dedi qor dırektory Marat Aıtmaǵambetov.
Aqtóbe oblysy ákiminiń baspasóz qyzmetiniń habarlaýynsha, ortalyqty 2018 jyldyń birinshi jartysynda paıdalanýǵa berý josparlanyp otyr. Mekemede aýtızm derti bar balalar men olardyń ata-analary bilikti mamandardan tolyqqandy kómek ala alady. Munda balalardy tekserý men emdeý, jalpy bilim beretin mektepke daıyndaý kezinde ata-analarǵa qoldaý kórsetiledi. Budan basqa ortalyq aýtıst balalarmen jumys isteıtin mamandardy daıarlaıdy.
«Aýtızmmen kúres máselesinde mamandardy daıarlaýdyń mańyzy zor. Osyǵan baılanysty biz Amerıka men Eýropadan úzdik mamandardy shaqyramyz»,-dedi qordyq qamqorshylyq keńesiniń tóraǵasy Almaz Sharman. Ortalyqtaǵy barlyq qyzmet aqysyz júrgiziletin bolady.